इंद्राणीला नेण्यास मुलाचाच विरोध

मुंबई ः शीना बोरा हत्या खटल्यातील आरोपी इंद्राणी मुखर्जी हिने वडिलांच्या दशक्रिया विधीसाठी गुवाहाटीला नेण्यासाठी सत्र न्यायालयाने केलेल्या अर्जावरील निकाल गुरुवारी देण्यात येणार आहे. मात्र इंद्राणीचा मुलगा मिखाईल यानेच इंद्राणीला गुवाहाटीला नेण्यास विरोध केला आहे.

या संदर्भात मिखाईल याने पाठविलेल्या ईमेलची माहिती सीबीआयने न्या. महाजन यांना दिली. इंद्राणी हिने कधीच आपल्याला आर्थिक मदत केली नाही, वर्षभरापासून अंथरूणाला खिळलेल्या आजोबांची आपण सेवा केली, इंद्राणीने आपली बहीण शीना हिची हत्या केल्याने तिला गुवाहाटीला आणल्यास त्यातून आणखी तणाव निर्माण होईल, असाही मुद्दा मिखाईल याने मांडला आहे. आजीआजोबांनी आपल्याला कायदेशीर वारस जाहीर केल्याने त्यांच्या दशक्रियाविधीला आपण प्रारंभ केल्याचीही माहिती त्याने दिली आहे.

इंद्राणीला तुरुंगाबाहेर काढल्यास ती त्याचा गैरफायदा घेऊन पलायन करण्याची शक्यता सीबीआयच्या वकिलांनी व्यक्त केली आहे.