साश्रू नयनांनी जागवल्या आठवणी

‘ब्रेन-डेड’ आप्तांच्या अवयवांचे दान करणाऱ्या कुटुंबांचा हृद्य सत्कार

म. टा. विशेष प्रतिनिधी, मुंबई

सात वर्षांचा दियान उदानी ऑस्ट्रेलियाहून मुंबईत सुटीसाठी आला होता… अचानक एक दिवस डोकेदुखी सुरू झाली… चाचण्याअंती मेंदूत गाठ झाल्याचे निष्पन्न झाले… उपचार सुरू असताना त्याची तब्येत ढासळली आणि डॉक्टरांनी त्याला ‘ब्रेन डेड’ घोषित केले. आईवडिलांसाठी हा धक्का असह्य होता. पण त्याही परिस्थितीत आईने दियानच्या अवयवांचे दान करण्याचा निर्णय घेतला… आपल्या ‌प्रियजनांच्या निधनाचा धक्का सहन करतानाच, त्यांच्या अवयवांचे दान करण्याचा निर्णय घेऊन इतर रुग्णांना नवीन आयुष्य देणाऱ्या अशा ४३ कुटुंबांचा सोमवारी केईएममध्ये सत्कार करण्यात आला. हा सत्कार स्वीकारताना नातेवाईकांच्या अश्रूंचा बांध फुटला आणि उपस्थित सर्वांचेच डोळे पाणावले.

मुंबईत अवयवदान चळवळ फोफावत आहे. या चालना देण्यासाठी ब्रेन डेड रुग्णांच्या अवयवांचे दान करणाऱ्या त्यांच्या कुटुंबीयांचा सत्कार केईएम हॉस्पिटल व अवयव प्रत्यारोपण समितीच्या वतीने, मुख्यमंत्री देवेंद्र फडणवीस यांच्या पत्नी अमृता फडणवीस, डॉ. गुस्ताद डावर, डॉ. अविनाश सुपे यांच्या हस्ते करण्यात आला. यामध्ये सात वर्षांपासून ते सत्तार वर्षांपर्यंतच्या ‘ब्रेन डेड’ रुग्णांच्या नातेवाइकांचा समावेश होता.

ऑस्ट्रेलियात राहणाऱ्या दियानच्या आईने अवयवदानाचा निर्णय पूर्वीच घेतला होता, त्यावेळी लहानग्या दियाननेही अवयवदानाची इच्छा व्यक्त केली होती. मात्र सातव्या वर्षीच त्याच्यावर ही वेळ येईल, असे कोणाच्या स्वप्नातही आले नव्हते. पण पुत्रशोकातून सावरत, दियानची आई मिनी यांनी मुलाच्या अवयवांचे दान करण्याचा निर्णय घेतला. त्याच्या हृदयाचे गोरेगावमधील एका मुलीवर प्रत्यारोपण झाले. इतर अवयवांचेही गरजू रुग्णांवर प्रत्यारोपण करण्यात आले. हे सर्व सांगताना दियानचे काका मिलन उदानी यांच्या डोळ्यातून अश्रू ओघळत होते.

जीवन देऊ शकतो… जेमतेम सहा हजार रुपये पगारावर सुरक्षारक्षक म्हणून काम करणाऱ्या जीवराज परमार यांच्या लाडक्या मुलीला, १६ वर्षांच्या विद्याला डॉक्टरांनी ब्रेनडेड घोषित केल्यावर जीवराज यांनी तिच्या अवयवांचे दान करण्याचा निर्णय घेतला. त्याला घरच्यांचा प्रारंभी विरोध होता. आपण कोणाला तरी जीवनदान देऊन शकतो, असे सांगत जीवराज यांनी आपल्या निर्णयावर ठाम राहत लाडक्या मुलीच्या अवयवांचे दान केले.

या आप्तांचा सत्कार ब्रेनडेड झालेल्या आपल्या आप्तांच्या अवयवांचे दान करून दुसऱ्यांना जीवनदान देणारे सदाशीव सुवर्णा, श्रध्दा गुप्ता, वसंथा व्यंकटेश, गॅब्रीयल डिसोझा, मालुबाई पाटील, अनिल देसाई, नम्रता ननावरे, चंद्रकांत नेरकर, नरेंद्र चौधरी यांच्यासह सुमारे ४३ कुटुंबियांचा यावेळी सत्कार करण्यात आला.