हार्बर मार्गावर खोळंबा, सिग्नल बिघाडामुळे लोकल २० ते २५ मिनिटे विलंबाने

म. टा. प्रतिनिधी, मुंबई : हार्बर मार्गावरील कुर्ला स्थानकाजवळील सिग्नल यंत्रणेत बिघाड झाल्याने सोमवारी लोकल फेऱ्या २० ते २५ मिनिटे विलंबाने धावत होत्या. सायंकाळी गर्दीच्या वेळेपूर्वीच हा बिघाड झाल्याने त्याचा परिणाम सायंकाळच्या वेळापत्रकावरदेखील झाल्याचे दिसून आले. या बिघाडामुळे प्रवाशांना मनस्ताप सहन करावा लागला.

दुपारी ४.१५च्या सुमारास कुर्ला स्थानक परिसरात सिग्नल यंत्रणेत बिघाड झाला. या बिघाडामुळे अनेक लोकल गाड्या खोळंबल्या. एकामागोमाग एक लोकलच्या रांगा लागल्या, मात्र नेमके काय झाले याचा अंदाज येत नसल्याने गाडीतील प्रवाशांची चिडचिड होत होती.

सिग्नल बिघाडाची माहिती मिळाल्यानंतर रेल्वेचे दुरुस्ती पथक तातडीने घटनास्थळी दाखल झाले. जवळपास अर्धा तास दुरुस्तीकाम सुरू होते. काम पूर्ण झाल्यावर हार्बर मार्गावरील लोकल फेऱ्या पूर्ववत झाल्या. मात्र त्यानंतरही लोकल काहीशा विलंबाने धावत होत्या. त्यामुळे कामावरून घरी परतणाऱ्या नोकरदारांना मनस्ताप सहन करावा लागला.

दरम्यान, तांत्रिक बिघाड झाल्याने लोकल विलंबाने धावत असल्याची उद्घोषणा रेल्वे स्थानकांवर सुरू होती, असे रेल्वे अधिकाऱ्यांकडून सांगण्यात आले.