रेल्वे प्रवाशांसाठी सोमवार ठरला घातवार; १४ ठार

मटा ऑनलाइन वृत्त । मुंबई

मुंबईकर लोकल प्रवाशांसाठी सोमवारचा दिवस घातवार ठरला. रेल्वे अपघातामध्ये सोमवारी १४ जणांचा मृत्यू झाला तर आठ जण जखमी झाले आहेत. मृतांमध्ये एका महिलेचा समावेश आहे.

सोमवारी ईदच्या सणामुळे लोकल ट्रेनला गर्दी होती. सुट्टीच्या दिवशी असणाऱ्या वेळापत्रकाप्रमाणे मध्य रेल्वेच्या लोकल धावत होत्या. त्यामुळे प्रवाशांना गर्दीचा त्रास सहन करावा लागत होता. रेल्वे पोलिसांनी दिलेल्या माहितीनुसार, वाशी येथे ३, वसई रोड येथे ३, वडाळा रोड व कल्याण रेल्वे पोलीस ठाण्याच्या हद्दीत दोन जणांच्या मृत्यूची नोंद करण्यात आली. तर, ठाणे, डोंबिवली, बोरिवली, मुंबई सेंट्रल रेल्वे पोलीस ठाण्याच्या हद्दीत प्रत्येकी एका अपघाती मृत्यूची नोंद करण्यात आली होती. रविवारी, २५ जून रोजी रेल्वे अपघातात आठ जणांचा मृत्यू तर १४ जखमी झाले होते. रेल्वे अपघातामध्ये दरवर्षी हजारो प्रवाशी दगावतात. त्यामुळे मुंबईकरांची 'लाइफलाइन' त्यांच्या प्राणांवर बेतत असल्याची टीका करण्यात येते. प्रवाशांच्या मृत्यूचे प्रमाण कमी करण्यासाठी रेल्वे प्रशासन विविध प्रयत्न करत असते. तर, रेल्वे प्रशासनाने रखडलेले प्रकल्प पूर्ण करून गाड्यांची संख्या वाढवावी अशी मागणी प्रवासी संघटनांकडून करण्यात येते.