मध्य रेल्वेवर वाढले फुकटे प्रवासी

म. टा. खास प्रतिनिधी, मुंबई

मध्य रेल्वेवर एप्रिल ते जून कालावधीत फुकट्या प्रवाशांची संख्या ११ लाखांवर गेली असून त्यांच्याकडून ५९ कोटी ३६ लाख रुपयांचा दंड वसूल करण्यात आला आहे. गेल्या वर्षी याच तीन महिन्यांच्या कालावधीतील फुकट्या प्रवाशांची संख्या ९ लाख ८३ हजार इतकी होती. यावर्षी त्यात १० टक्क्यांनी वाढ झाली आहे.

मध्य रेल्वेवर लोकल, मेल, एक्स्प्रेस गाड्यांप्रमाणेच स्थानकांवरही नियमभंग करणाऱ्या प्रवाशांवर कारवाई केली जाते. त्यात विनातिकीट प्रवास, स्वत:चे आरक्षित तिकीट दुसऱ्यास देणे, क्षमतेपेक्षा जादा सामान वाहून नेणे आदींचा समावेश होतो. यावर्षी एप्रिल ते जूनमध्ये केलेल्या कारवाईत १० लाख ८५ हजार प्रकरणे नोंदवण्यात आली. गतवर्षी याच कालावधीत ही संख्या ९ लाख ८३ हजार इतकी होती.

जूनमधील कारवाईत तीन लाख २६ हजार फुकट्या प्रवाशांकडून १७ कोटी २० लाख रुपयांचा दंड वसूल झाला आहे. आरक्षित तिकीट दुसऱ्या व्यक्तीस देण्याबाबतच्या ३९१ गुन्ह्यांची नोंद असून, त्यातून चार लाख रुपयांचा दंड वसूल करण्यात आला आहे.

कारवाईची आकडेवारी

कालावधी फुकट्यांची संख्या दंड

एप्रिल ते जून २०१८ १० लाख ८५ हजार ५९ कोटी ३६ लाख रु.

एप्रिल ते जून २०१७ ९ लाख ८३ हजार ५४ कोटी रु.

जून २०१८ ३ लाख २६ हजार १७ कोटी २० लाख रु.

जून २०१७ २ लाख ५८ हजार १२ कोटी ७८ लाख रु.