महापौरांचा गृहप्रवेश लांबणार?

बंगल्याच्या नूतनीकरणास सुरुवातच नाही

म. टा. खास प्रतिनिधी, मुंबई

शिवाजी पार्क येथील महापौर निवासाची जागा शिवसेनाप्रमख बाळासाहेब ठाकरे यांच्या स्मारकासाठी देण्याचा निर्णय घेण्यात आल्याने नव्या महापौरांना भायखळ्याच्या राणीच्या बागेतील अतिरिक्त आयुक्तांच्या बंगल्यात मुक्काम हलवावा लागणार आहे. मात्र या बंगल्याच्या नूतनीकरणास अद्याप सुरुवात न झाल्यामुळे नव्या महापौरांचा गृहप्रवेश लांबणीवर पडण्याची दाट शक्यता आहे. नव्या महापौरांना किमान तीन महिने स्वत:च्याच घरी रहावे लागणार आहे.

मुंबई महापालिकेत शिवसेना आणि भाजपची सत्तेची गणिते आखली जात आहेत. महापौर कुणाचाही आला तरी नव्या महापौरांना शिवाजी पार्कमधील हेरिटेज महापौर निवासाचे वैभव अनुभवता येणार नाही. राणीच्या बागेमध्ये दोन बंगले असून एक बंगला उद्यान अधीक्षकांचा तर दुसरा बंगला अतिरिक्त आयुक्तांसाठी राखून ठेवण्यात आला आहे.

महापौर निवासाची जागा बाळासाहेब ठाकरे स्मारकासाठी देण्यात आल्यानंतर महापौरांच्या पर्यायी निवासस्थानाची निवड अद्यापही झालेली नाही. अतिरिक्त आयुक्तांच्या बंगला देण्याचे जवळपास निश्चित झाले आहे. मात्र त्याच्या नूतनीकरणाच्या कामाला अद्याप सुरुवात झालेली नाही. या नूतनीकरणास तीन महिने लागणार असल्याने नवीन महापौरांना स्वत:च्या घरीच राहावे लागणार आहे.