'तुम्ही गुरू माँ असाल किंवा गुरू पिता; बाळासाहेबांच्या मुलाला सर्टिफिकेट देऊ नका'

मुंबई: महाराष्ट्राच्या दौऱ्यावर असलेल्या साध्वी कांचन गिरी (Kanchan Giri) यांनी आज कृष्णकुंज निवासस्थानी जाऊन मनसे अध्यक्ष राज ठाकरे (Raj Thackeray) यांची भेट घेतली. तसंच, राज ठाकरे यांना अयोध्या दौऱ्याचं आमंत्रण दिलं. तत्पूर्वी, मीडियाशी बोलताना कांचन गिरी यांनी शिवसेनेचे पक्षप्रमुख तथा मुख्यमंत्री उद्धव ठाकरे (Uddhav Thackeray) यांच्यावर टीका केली होती. त्या टीकेला शिवसेनेनं सडेतोड उत्तर दिलं आहे. 'उद्धव ठाकरे यांनी बाळासाहेब ठाकरे यांचं नाव बुडवलं आहे. बाळासाहेब जे बोलायचे, ते करायचे. ते प्रखर हिंदुत्ववादी होते. हिंदूंसाठी ते वाघासारखी डरकाळी फोडायचे. पण उद्धव ठाकरे यांच्यावर आम्ही नाराज आहोत. ते मुस्लिमधार्जिण्यांसोबत गेले आहेत,' असं कांचन गिरी म्हणाल्या होत्या. मुंबईच्या महापौर किशोरी पेडणेकर (Kishori Pednekar) यांनी कांचन गिरी यांच्या या वक्तव्याचा जोरदार समाचार घेतला आहे. 'धार्मिक क्षेत्रातील लोकांनी राजकारणात पडू नये असं माझं वैयक्तिक मत आहे. तुम्ही गुरू माँ असा किंवा गुरू पिता, त्याच्याशी आम्हाला घेणंदेणं नाही. पण थेट राजकीय वक्तव्य करू नका. बाळासाहेबांचा मुलगा काय करू शकतो आणि काय नाही ही सर्टिफिकेट तुम्ही देण्याची गरज नाही,' असं पेडणेकर यांनी कांचन गिरी यांना सुनावलं आहे.

वाचा: आर्यन खान प्रकरणामुळं चर्चेत आलेल्या किरण गोसावीच्या सहाय्यकाला अटक

राज ठाकरे यांचं नाव न घेता पेडणेकर यांनी कांचन गिरी यांच्यावर टीका केली. 'राम मंदिरासाठी शिवसेनेनं दिलेलं योगदान कोणी विसरणार नाही. उद्धव ठाकरे अयोध्येत जाऊन आले तेव्हा हे सगळे कुठे होते? आता तुम्हाला ज्यांना डोक्यावर घ्यायचं त्यांना घ्या. तुम्हाला जो अजेंडा चालवायचा तो चालवा. आमचं काही म्हणणं नाही. पण हिंदुत्वाच्या फूटपट्टया घेऊन बाळासाहेब ठाकरे किंवा उद्धव ठाकरे यांना मोजण्याचा प्रयत्न करू नका,' असा इशारा पेडणेकर यांनी दिला आहे. 'देशात नव हिंदुत्व जन्माला आलंय. हे नव हिंदुत्व आम्हाला मान्य नाही, असं खुद्द उद्धव ठाकरे यांनी म्हटल्याची आठवण त्यांनी करून दिली.
वाचा: शिवसेनेच्या अडचणी वाढल्या! खासदार भावना गवळी यांना ईडीचं पुन्हा समन्स

मनसेकडून यूपी, बिहारींवर झालेल्या हल्ल्यांचा संदर्भ देत पेडणेकर यांनी कांचन गिरींवर टीका केली. 'यूपी आणि बिहारीवर हल्ले होत होते, तेव्हा या ज्या कोणी माँ आहेत, त्या कुठं होत्या? स्वत:ला माँ म्हणवता ना? मग तसं वागा,' असा टोलाही त्यांनी हाणला.

वाचा: राज्यातील वाहतूकदारांना कर सवलत मिळणार?; मुख्यमंत्री म्हणाले...