मनसेचं आता गुजराती पाट्यांविरोधात आंदोलन

मटा ऑनलाइन वृत्त । मुंबई

मागील लोकसभा निवडणुकीपासून राज्याच्या राजकारणातून जवळपास हद्दपार झालेल्या महाराष्ट्र नवनिर्माण सेनेनं पुन्हा 'दखलपात्र' होण्यासाठी प्रयत्न सुरू केले आहेत. त्यासाठी पुन्हा एकदा मराठी पाट्यांचं आंदोलन हाती घेण्यात आलं आहे. मात्र, यावेळी इंग्रजी किंवा हिंदी नव्हे, तर गुजराती भाषेतील पाट्या मनसेचं लक्ष्य ठरल्या आहेत. दादर भागातील काही गुजराती पाट्यांची मनसे कार्यकर्त्यांनी नासधूस केली आहे.

मुंबईतील मध्यवर्ती ठिकाण असलेल्या दादर भागातील काही दुकानांवर गुजरातील भाषेतील पाट्या झळकत होत्या. मनसे कार्यकर्त्यांनी या पाट्या काढून फेकून दिल्या आहेत. या प्रकरणी पोलिसांनी सात कार्यकर्त्यांना अटक केली आहे.

मनसे अध्यक्ष राज ठाकरे यांनी मराठीचा मुद्दा हाती घेतल्यानंतर सर्वप्रथम उत्तर भारतीयांना लक्ष्य केलं होतं. उत्तर भारतीयांमुळं मुंबई, महाराष्ट्रातील नागरी सुविधांवर येणारा ताण, वाढती गुन्हेगारी याकडं लक्ष वेधत त्यांनी मराठी मतदारांना मोठ्या प्रमाणात आकर्षित केलं होतं. त्या जोरावर नाशिक महापालिकेत महापौर बसवण्याबरोबरच राज्याच्या विधानसभेत १३ आमदारही निवडून आणले होते. मात्र, नंतर हे आंदोलन थंडावलं. मनसेच्या लोकप्रतिनिधींना फारशी चमक न दाखवता आल्यानं मनसेची हवाही ओसरली. त्याचा मोठा फटका निवडणुकीत बसला. आता पुन्हा एकदा राज ठाकरे यांनी जम बसविण्याचे प्रयत्न सुरू केले आहेत. त्यातूनच मनसेनं हे आंदोलन सुरू केलं आहे. देशात व महाराष्ट्रात भाजपचं सरकार आल्यापासून गुजराती भाषिकांचं वर्चस्व वाढत असल्याची भावना काही समाजांमध्ये आहे. ही भावना 'कॅश' करण्याचा मनसेचा प्रयत्न असल्याचं बोललं जात आहे. Mumbai: MNS party workers vandalise a jewellery store's nameplate written in Gujarati, in Dadar. pic.twitter.com/HwH7FIycI8 — ANI (@ANI_news) July 28, 2017