​ मोबाइलचोरीची ‘नोंद’ वाढणार

लोकल प्रवासातील दररोज हरविणाऱ्या, चोरीस जाणाऱ्या मोबाइलची संख्या मोठी असली, तरी रेल्वे पोलिसांची अधिकृत नोंद एका वर्षाला हजारावरही गेलेली नाही. एफआयआरनुसार, या वर्षी एप्रिलपर्यंत केवळ ४०० मोबाइल हरविले आहेत. त्यापूर्वीच्या दोन वर्षातील मोबाइल चोरीची नोंद ९००च्या पुढे गेलेली नाही. माहिती अधिकार कार्यकर्ते नितीन गायकवाड यांनी मागविलेल्या माहितीत ही बाब स्पष्ट झाली आहे.

.. म्हणून आकडा लहान

लोकल, मेल/एक्स्प्रेस, प्लॅटफॉर्म आदी ठिकाणी मोबाइल हरविणे वा चोरीस जाण्याचे प्रकार मोठ्या संख्येत असले, तरी बहुतांश रेल्वे पोलिस स्थानके वा चौक्यांमध्ये त्याची एफआयआरमध्ये नोंद घेतली जात नाही, अशी तक्रार आहे. प्रवाशांना नव्याने सीम कार्ड घेण्यासाठी आवश्यक असल्याने मोबाइल हरविल्याच्या नोंदीचा कागद दिला जातो.

धोरणात बदल

रेल्वेच्या धोरणातील ही त्रुटी दूर होण्याच्या मार्गावर आहे. मोबाइल चोरी, गहाळ वा हरविल्याची तक्रार नोंदवून घेण्याचे आदेश देण्यात आल्याचे कळते. त्यामुळे पुढील महिन्यांतील मोबाइलसंदर्भातील तक्रारींच्या संख्येत मोठी वाढ होण्याचा अंदाज आहे.