​ ‘नो इंटरनेट’... ७,०००चे बिल!

एमटीएनएलचा अजब कारभार

म. टा. प्रतिनिधी, मुंबई

डिजिटल इंडियाच्या माध्यमातून सर्वांपर्यंत इंटरनेट पोहचविण्यासाठी सुरू असलेल्या प्रयत्नांचा फटका सर्वसामान्य ग्राहकाला बसल्याचे एक उदाहरण नुकतेच समोर आले आहे. शिवाजी पार्क येथे राहणाऱ्या एका ग्राहकाला मोबाइलवर ‘नो इंटरनेट कनेक्शन’ असे दाखवूनही सात हजारांचे बील एमटीएनएलच्या डॉल्फिन सेवेकडून पाठवण्यात आले आहे. यासंदर्भात एमटीएनएलकडे तक्रार केली असता, तुमचे इंटरनेट सुरू केले असून तुम्हाला हे बील भरावेच लागले, असा पवित्रा एमटीएनएलने घेतला आहे.

शिवाजी पार्क येथे राहणाऱ्या प्रतिभा जोशी यांनी मोबाइलवर इंटरनेट सेवा सुरू करण्यासंदर्भात एमटीएनलकडे मागणी केली होती. त्यांना ९९ रुपये मासिक भाडे असलेले पॅकेज देण्यात आले. एमटीएनएलकडून सप्टेंबर महिन्यापासून त्यांच्या मोबाइलवर इंटरनेट सेवा सुरू झाली. मात्र ९९ रुपयांचे पॅकेज घेतले असतानाही कंपनीकडून ३९९ रुपयांचे पॅकेज माथी मारल्याचे बील आल्यावर त्यांच्या लक्षात आले. त्यानंतर ऑक्टोबरमध्ये आलेले मोबाइल बील पाहून त्यांना धक्काच बसला. तुम्ही सप्टेंबरमध्ये ७,०२८ रुपयांचा इंटरनेट डाटा वापरल्याचे सांगत तब्बल ६ हजार ७२२ रुपयांचे बील जोशी यांना धाडण्यात आले. जोशी यांनी यासंदर्भात शिवाजी पार्क येथील एमटीएनएलच्या कार्यालयात तक्रार केली. मात्र त्यांना बीकेसी येथील कार्यालयात तक्रार करण्यास सांगण्यात आले. त्यानंतर नोव्हेंबरमध्येही तीन हजारांचे इंटरनेटचे बील एमटीएनएलकडून पाठविण्यात आले.

सप्टेंबर महिन्यात आपल्याला मोबाइलमध्ये पूर्ण महिन्यात मोबाइलवर ‘नो इंटरनेट कनेक्शन’ असे दाखविण्यात येत होते. तरीही एवढे बिल म्हणजे आर्थिक आणि मानसिक छळ असल्याचा आरोप जोशी यांनी केला आहे.