मुंबईतील ७० रुग्णालये करोनामुक्त; आता इतर आजारांवर उपचार करणार

मुंबई : वाढत्या करोनासंसर्गाचा सामना करण्यासाठी पालिकेने खासगी रुग्णालयांसह उपनगरांमधील छोटी नर्सिग होम, रुग्णालयांमध्येही करोनाचे रुग्ण दाखल करण्यासंदर्भात निर्देश दिले होते. पावसाळी आजारांचे आव्हान लक्षात घेता, आता ही रुग्णालये नॉनकोविड करण्यात येणार आहेत. शेवटचा करोनारुग्ण घरी पाठवल्यानंतर ७० रुग्णालये करोनाव्यतिरिक्त आजारांच्या उपचारासाठी खुली करण्यात येणार आहेत.

पावसाचा जोर वाढल्यानंतर मलेरिया, डेंग्यू, लेप्टोस्पायरोसिस तसेच इतर संसर्गजन्य तापांचा जोर वाढण्याची शक्यता नाकारता येत नाही. मागील वर्षीच्या तुलनेत यावर्षी जुलै व ऑगस्टमध्ये मलेरिया रुग्णांची संख्या जास्त दिसून आली. तसेच दोन रुग्णांचा मलेरियामुळे मृत्यूही झाला. पालिकेने सुरू केलेल्या नियंत्रण कक्षामार्फत शहराच्या प्रत्येक प्रभागात छोट्या रुग्णालयांसह नर्सिग होममध्येही करोनाचे रुग्ण दाखल करण्यात आले आहेत. मात्र करोनारुग्णांची संख्या आता नियंत्रणात असल्यामुळे संसर्ग झालेल्या नव्या रुग्णांना मोठ्या रुग्णालयांसह जम्बो सुविधा, करोना काळजी कक्षाची उपलब्धता असणार आहे.

पावसाळ्यात संसर्गजन्य तापासह इतर तापांचा त्रासही होतो. सर्वसामान्यांच्या मनामध्ये करोनामुळे ताप येतो ही भीती आहे. करोनाचे रुग्ण दाखल असतील, या धास्तीने रुग्णालयांमधून तातडीने उपचारही घेतले जात नाहीत. करोनाव्यतिरिक्त अन्य आजारांमध्ये तातडीने उपचार मिळावेत, यासाठी हा निर्णय घेण्यात आल्याचे यासंदर्भात पालिकेचे अतिरिक्त आयुक्त सुरेश काकाणी यांनी सांगितले.

मुंबईच्या अनेक प्रभागांमध्ये करोनावर नियंत्रण आलेले आहे. पूर्वी ठरवलेल्या नियोजित शस्त्रक्रिया, प्रसूती तसेच इतर विविध प्रकारच्या व्याधींसाठी छोटी नर्सिग होम, तसेच खासगी रुग्णालयांचा पर्यायही सामान्यांना उपलब्ध हवा यासाठी आता नियंत्रण कक्षाच्या माध्यमातून येथे करोनाचे रुग्ण दाखल करण्यात येणार नाहीत. मोठी रुग्णालये, जम्बो सुविधांमध्ये करोनारुग्णांवर उपचार सुरू राहतील.

संध्याकाळच्या 'ओपीडी' सुरू

पालिकेच्या केईएमसह काही उपनगरीय रुग्णालयांमध्ये संध्याकाळच्या ओपीडीची उपलब्धता असते. या ओपीडींमधून रुग्णांना आता वैद्यकीय सेवा देण्यात येणार आहे. पालिका रुग्णालयाचे संचालक डॉ. रमेश भारमल यांनी करोनाव्यतिरिक्त आजारांसाठी पूर्ण खबरदारी घेत उपचार दिले जातात, असे सांगितले.


रुग्णांची वाढती गर्दी

करोनासंसर्ग नियंत्रणात आल्यानंतर पालिकेने मागील महिन्यात नायर रुग्णालयाचे रूपांतर पुन्हा नॉनकोविड रुग्णालयामध्ये केले. येथे टप्प्याटप्प्याने काही विभाग पुन्हा सुरू करण्यात आले. पहिल्या पंधरवड्यामध्ये पुन्हा सुरू झालेल्या 'ओपीडी'मध्ये रुग्णांची गर्दी नव्हती. मात्र पावसाळी आजारांनी डोके वर काढल्यानंतर त्यांवर उपचार घेण्यासाठी येणारे रुग्ण वाढते असल्याचे दिसून येत आहे. नायर, लो. टिळक रुग्णालय, केईएम येथील 'ओपीडी'मध्ये आता इतर आजारांच्या रुग्णांची संख्याही वाढती आहे.