मुंबई पालिकेच्या सर्व शाळा इंग्रजी करण्याचा घाट

म. टा. विशेष प्रतिनिधी, मुंबई

मराठी माणसाच्या अस्तित्वाच्या लढ्यासाठी जन्माला आलेल्या शिवसेनेच्या ताब्यात असलेल्या मुंबई महापालिकेच्या सर्व शाळा इंग्रजी करण्याचा घाट घातला जात आहे. पटसंख्या वाढविण्यासाठी पालिकेच्या मराठीसह अन्य प्रादेशिक भाषांच्या शाळांमध्ये प्रथम भाषा इंग्रजी करण्यात आली आहे. तसेच पहिलीपासून सेमी-इंग्रजी आणल्यामुळे आता मराठी भाषेचा वापर फक्त समाजशास्त्र विषयापुरताच उरला आहे.

शहरातील पालकांचा इंग्रजी माध्यमाच्या शाळेतील ओढा लक्षात घेऊन मुंबई महानगरपालिकेनेही आपल्या शाळांमध्ये सेमी-इंग्रजी सुरू केले. यामध्ये सुरुवातीला पाचवीपासून गणित व विज्ञान विषय इंग्रजीत शिकविण्यास सुरुवात झाली. यानंतर मागील शैक्षणिक वर्षात इयत्ता पहिलीपासून पालिकेने शाळांमध्ये प्रथम भाषा इंग्रजी लागू करण्याचा निर्णय घेतला. मात्र त्यामुळे विद्यार्थ्यांचे अधिक नुकसान होण्याची भीती व्यक्त होत आहे. पटसंख्या वाढविण्यासाठी हा निर्णय घेण्यात आल्याचे सांगण्यात येत असले तरी प्रत्यक्षात त्याचा परिणाम यंदाच्या प्रवेश संख्येच्या वाढीत दिसून आलेला नाही. तसेच इंग्रजी, गणित, विज्ञान हे विषय जर इंग्रजीतून शिकविले जात असतील, तर या शाळांमध्ये मराठीचे अस्तित्व केवळ मराठी भाषेव्यतिरिक्त केवळ समाजशास्त्र विषयापुरतेच उरले आहे. हा प्रकार म्हणजे पालिका शाळांचे रूपांतर इंग्रजी शाळांमध्ये करण्यासारखेच आहे, असा आरोप शिक्षण क्षेत्रातून करण्यात येत आहे.

पालिका म्हणते, 'हे विद्यार्थी हित'

पालिका शाळांमध्ये सेमी-इंग्रजी सुरू करण्यात आल्यानंतर गणित व विज्ञान हे विषय इंग्रजीत शिकविण्यास सुरुवात झाली. मात्र, त्यातील काही शब्द हे विद्यार्थ्यांना समजण्यास जड जाऊ लागले. यामुळे विद्यार्थी हित लक्षात घेत इंग्रजीला प्रथम भाषेचा दर्जा देण्याचा निर्णय घेण्यात आल्याचे महापालिकेचे शिक्षणाधिकारी महेश पालकर यांनी सांगितले.

१०३३ : पालिकेच्या एकूण शाळा

२५० : इंग्रजी माध्यमाच्या शाळा

६७२ : शाळांमध्ये प्रथम भाषा इंग्रजी

१११ : शाळांमध्ये पूर्वीचीच प्रथम भाषा