महिन्याभरात ४०० टक्के मुंबईकर झाले क्वॉरंटाइन

मुंबई: करोना रुग्णांच्या संपर्कात आलेल्यांना क्वॉरंटाइन करण्यात येते. मुंबईत गेल्या महिन्याभरात क्वॉरंटाइन होणाऱ्यांच्या संख्येत मोठी वाढ झाली आहे. मुंबईत महिन्याभरात क्वॉरंटाइन होणाऱ्यांची संख्या ४४१ टक्क्यांनी वाढली आहे. १५ एप्रिलपर्यंत शहरात ४३ हजार २४९ लोक होम क्वॉरंटाइन होते. १३ मेपर्यंत या संख्येत २.३४ लाखाने वाढ झाली आहे.

मुंबई महापालिकेच्या अहवालात ही माहिती देण्यात आली आहे. करोनाचा प्रादुर्भाव सुरू झाल्यापासून करोनाची लक्षणे असलेल्यांना मुंबईत होम क्वॉरंटाइन करण्यात आले आहे. ६ एप्रिलपर्यंत मुंबईत १० हजार ९६८ लोक होम क्वॉरंटाइन होते. ही संख्या १७ एप्रिलपर्यंत ५३ हजार ११८ झाली आहे. म्हणजे होम क्वॉरंटाइन होणाऱ्यांच्या संख्येत अवघ्या ११ दिवसांत ३८४ टक्क्यांनी वाढ झाली आहे. जेव्हा एखाद्या व्यक्तीला करोनाची लागण होते, तेव्हा त्याच्या संपर्कातील लोकांना क्वॉरंटाइन केलं जातं. जोपर्यंत त्यांचा करोना रिपोर्ट निगेटिव्ह येत नाही, तोपर्यंत त्यांना क्वॉरंटाइन केलं जातं. त्यामुळे क्वॉरंटाइन होणाऱ्यांची संख्या वाढत आहे. ज्यांच्यामध्ये करोनाचे लक्षणं आढळतात अशा लोकांनाही क्वॉरंटाइन सेंटरमध्ये हलवले जाते, असं महापालिकेच्या एका अधिकाऱ्याने सांगितले. त्याचप्रमाणे रुग्णाच्या इमारतीत राहणाऱ्यांना १४ दिवस इमारतीबाहेर पडण्यास मज्जाव करण्यात येतो. त्यांचीही करोना तपासणी केली जाते, असंही पालिकेच्या अधिकाऱ्याने स्पष्ट केलं.

मुख्यमंत्री कमी पडताहेत असं म्हणालोच नव्हतो: पृथ्वीराज चव्हाण

होम क्वॉरंटाइन असलेल्या २.३४ लाख लोकांपैकी १२,६३६ लोकांना संस्थात्मक क्वॉरंटाइन करण्यात आले आहे. तर ९५ हजार १५४ जणांनी त्यांचा १४ दिवसांचा क्वॉरंटाइन कालावधी पूर्ण केला आहे. ज्या ठिकाणी करोना रुग्णांची संख्या अधिक आहे, अशा भागांना कंटेन्मेंट झोन म्हणून घोषित करण्यात आले आहे. सध्या मुंबईत एकूण ६६१ कंटेन्मेंट झोन आहेत. गेल्या आठवड्यात ही संख्या २ हजार ६०० एवढी होती. महापालिकेने कंटेन्मेंट झोनची पुनर्रचना करत सील बिल्डिंग ही नवी वर्गवारी तयार केली आहे. त्यानुसार मुंबईत एकूण १११० सील इमारती आहेत.

करोना तपासणीसाठी ठेवलेला मृतदेह हॉस्पिटलमधून गायब

उद्धव ठाकरे यांचं मुख्यमंत्रिपद कायम; घेतली आमदारकीची शपथ