मुंबई पोलीस दलातील आणखी एका पोलिसाचा करोनानं मृत्यू

मुंबई: करोनाविरोधात लढणाऱ्या मुंबई पोलीस दलाला आणखी एक धक्का बसला आहे. विलेपार्ले पोलीस ठाण्यात नेमणुकीला असलेल्या ५५ वर्षीय पोलीस कॉन्स्टेबलचा करोनाच्या संसर्गाने गुरुवारी मृत्यू झाला. त्यामुळे आता मुंबई पोलीस दलातील मृत्यू झालेल्या पोलिसांची संख्या ११ झाली आहे.

करोनाविरोधातील लढ्यात आघाडीवर असलेल्या राज्यातील पोलीस दलाला या विषाणूनं विळखा घातला आहे. राज्यातील करोनाबाधित रुग्णांची संख्या वाढत असताना, आता मृत्यूचा आकडाही वाढत आहे. ठाण्यातील एका महिला पोलीस कर्मचाऱ्याचा करोनाच्या संसर्गाने मृत्यू झाल्याच्या घटनेला काही तास उलटत नाहीत, तोच मुंबईतील एका पोलीस कॉन्स्टेबलला प्राण गमवावे लागले आहेत. मृत पोलीस कॉन्स्टेबल हे ५५ वर्षांचे होते. विलेपार्ले पोलीस ठाण्यात ते नेमणुकीला होते. गुरुवारी त्यांचा करोनाच्या संसर्गामुळे मृत्यू झाला. त्यांच्यावर ९ मेपासून रुग्णालयात उपचार सुरू होते. आता मुंबई पोलीस दलातील करोनाबाधित कर्मचाऱ्यांची संख्या ११वर पोहोचली आहे.

दरम्यान, आज दुपारी ठाणे पोलीस दलातील एका करोनाबाधित महिला कर्मचाऱ्याचा मृत्यू झाला. ठाण्यातील श्रीनगर पोलीस ठाण्यात त्या पोलीस शिपाई म्हणून कार्यरत होत्या. १९ मे रोजी या महिला पोलीस कर्मचाऱ्यास रुग्णालयात दाखल करण्यात आले होते. उपचार सुरू असताना दुसऱ्या दिवशी करोना चाचणीसाठी त्यांच्या घशातील स्वॅब घेण्यात आला होता. आज त्यांचा अहवाल पॉझिटिव्ह आला. मात्र, करोनाशी झुंज देत असताना आजच दुपारी साडेतीन वाजता त्यांचा मृत्यू झाला. करोनाबाधित महिला पोलिसाचा मृत्यू झाल्याची ही राज्यातील पहिलीच घटना आहे.

दुर्दैवी घटना! ठाणे अग्निशमन दलातील फायरमनचा अपघातात मृत्यू

शहीद जवानाच्या पोलीस पत्नीचा करोनाने मृत्यू; ठाणे हळहळले