मुंबईत १ कोटी ४० लाख जप्त, तिघे ताब्यात

मटा ऑनलाइन वृत्त । मुंबई

मुंबईत अंधेरी पश्चिमेस असलेल्या डी.एन. नगर भागात पोलिसांनी कारवाई करत १ कोटी ४० लाख रुपये जप्त केले आहेत. या प्रकरणी पोलिसांनी तिघांना ताब्यात घेतलं आहे. जप्त केलेल्या पैशात नव्या आणि जुन्या नोटांचा समावेश आहे.

अंधेरी पश्चिमेला जुहू वर्सोवा लिंक रोडला नाका नंदी पॉइंट येथील जुहू धारा कॉम्पलेक्सच्या ठिकाणी संध्याकाळी सात वाजेच्या सुमारास पोलिसांनी ही कारवाई केली. एमएच-४८ एसी-५१५२ या टोयोटा कारवर पोलिसांना संशय आला. पोलिसांनी गाडीची तपासणी केल्यानंतर त्यांना १ कोटी ४० लाखाची रोकड आढळून आली. या प्रकरणी पोलिसांनी गाडीतील तिघांना ताब्यात घेतलं आहे.

जप्त केलेल्या पैशांमध्ये हजार आणि पाचशेच्या नव्या आणि जुन्या नोटांचा समावेश आहे. जप्त केलेल्या पैशात नव्या पाचशेच्या नोटा आहेत. तर जुन्या नोटांमध्ये १ हजार रुपयाच्या नोटा पोलिसांना आढळून आल्या आहेत. या बाबत पोलिसांनी आयकर विभागाला माहिती दिली आहे. आयकर विभागाच्या चौकशीनंतर पुढील कारवाई होणार आहे.