दोन मार्गांवर आज लोकलविलंब

मुंबई: कल्याण- ठाणे अप मार्गावरील नियोजित मेगा ब्लॉग काही तांत्रिक कारणांमुळे रद्द करण्यात आला असल्याची माहिती आज सकाळी मध्य रेल्वेच्या अधिकृत ट्विटर हँडलवरून देण्यात आली आहे. छत्रपती शिवाजी महाराज टर्मिनस-चुनाभट्टी/वांद्रे मार्गावर मध्य रेल्वेने आज ब्लॉक घोषित केला आहे. सांताक्रूझ-गोरेगाव दरम्यान पश्चिम रेल्वेवर ब्लॉक काळातील कामे करण्यात येणार आहेत. परिणामी रविवारी मध्य, हार्बर, पश्चिम रेल्वेवरील लोकल फेऱ्या सुमारे १५ ते २० मिनिटे विलंबाने धावणार आहे.



हार्बर रेल्वे

स्थानक : सीएसएमटी ते चुनाभट्टी/वांद्रे

मार्ग : अप आणि डाऊन

वेळ : स. ११.३४ ते दु. ४.२३

परिणाम : ब्लॉक काळात सीएसएमटी ते चुनाभट्टी/वांद्रे मार्गावरील लोकल फेऱ्या रद्द राहणार आहेत. पनवेल-कुर्ला मार्गावर फ्लॅटफॉर्म क्र. आठवरून विशेष लोकल चालविण्यात येईल. सकाळी १० ते सायंकाळी ६ पर्यंत हार्बर मार्गावरील प्रवाशांना मध्य-पश्चिम मार्गावर प्रवास करण्याची मुभा आहे.

पश्चिम रेल्वे

स्थानक : सांताक्रुझ ते गोरेगाव

मार्ग : अप-डाऊन धीमा

वेळ : स. १०.३५ ते दु. ३.३५

परिणाम : ब्लॉक काळात अप-डाऊन धीम्या मार्गावरील लोकल फेऱ्या अप-डाऊन जलद मार्गावर वळवण्यात येणार आहेत. ब्लॉकमुळे विलेपार्ले स्थानकात दोन वेळा लोकल थांबवण्यात येणार असून राम मंदिर स्थानकात फ्लॅटफॉर्म नसल्यामुळे लोकल थांबणार नाही.

शटल सेवा बंद

अमन लॉज ते माथेरान दरम्यान शटल सेवा शुक्रवारपासून अनिश्चित काळासाठी बंद करण्याचा निर्णय मध्य रेल्वेने घेतला आहे. घाटात दरडी कोसळत असल्यामुळे हा निर्णय घेण्यात आल्याचे रेल्वे प्रशासनाने स्पष्ट केले. अमन लॉज ते माथेरान या ३ किमीच्या अंतरासाठी प्रवाशांना घोडागाडी आणि हातगाडी अशा वाहतूक व्यवस्था उपलब्ध असल्याचे स्थानिकांनी सांगितले.