‘राम मंदिर’ उद्‍घाटनाला अखेर मूहूर्त

२२ डिसेंबरला सुरेश प्रभू यांच्या हस्ते उद्घाटन, राज्यपाल राम नाईकही हजेरी लावणार!

म. टा. खास प्रतिनिधी, मुंबई

पश्चिम रेल्वेवरील सर्वाधिक प्रलंबित राहिलेल्या जोगेश्वरी ते गोरेगावमधील ‘राम मंदिर’ रेल्वे स्थानकाच्या उद्‍घाटनाच्या उद्घाटनास २२ डिसेंबरचा मुहूर्त निवडण्यात आला आहे. यापूर्वी दोन वेळा वेगवेगळ्या कारणांमुळे उद्‍घाटन सोहळा पुढे ढकलण्यात आला होता. या नव्या स्टेशनचे उद्‍घाटन रेल्वेमंत्री सुरेश प्रभू यांच्या हस्ते होणार आहे. उत्तर प्रदेशचे राज्यपाल राम नाईक या कार्यक्रमाला उपस्थित राहण्याची शक्यता आहे.

पश्चिम रेल्वेच्या अखत्यारीत येणाऱ्या हार्बर मार्गाचा विस्तार गोरेगावपर्यंत करण्याचा प्रकल्प मुंबई रेल्वे विकास महामंडळाने (एमआरव्हीसी) आखला. त्यात, स्थानिकांच्या मागणीनुसार जोगेश्वरी ते गोरेगावमध्ये ओशिवरा हे नवीन स्टेशन बांधण्याचा निर्णय घेण्यात आला. त्याला ३० कोटी रु. खर्च अपेक्षित होता. परंतु त्यात बराच काळ लोटल्याने खर्चात वाढ झाली. मुंबईच्या लोकल प्रश्नांच्या सोडवणुकीसाठी सातत्याने पुढाकार घेणारे राम नाईक विविध प्रकल्पांप्रमाणेच या स्टेशनसाठी प्रयत्न केले होते. त्यामुळे या सोहळ्यास राम नाईक यांच्या उपस्थितीसाठी रेल्वेमंत्री प्रभू स्वतः आग्रही होते. पूर्वनियोजित कार्यक्रमामुळे नाईक या सोहळ्याला उपस्थित राहणार नसल्याने हा कार्यक्रम लांबणीवर गेल्याचे सांगितले जाते. या परि​स्थितीत गुरुवारच्या सोहळ्यास राम नाईक यांची उपस्थिती लक्षणीय मानली जात आहे.

लगेचच कार्यान्वित

उद्‍घाटनानंतर राम मंदिर स्टेशनवर गुरुवार सायंकाळपासून किंवा दुसऱ्या दिवसापासून स्लो गाड्यांना थांबा देण्यात येईल, असे पश्चिम रेल्वेचे ​​विभागीय आयुक्त मुकुल जैन यांनी सांगितले.