भाडेकरार :​ सेनेचे थीम पार्क स्वप्न भंगणार

nitin.chavan@timesgroup.com

tweet : @nitinchavanMT

मुंबई : लीजवर दिलेल्या मालमत्तांच्या भाडेकराराचे नूतनीकरण करण्याच्या धोरणाला महापालिकेच्या सुधार समितीने नुकतीच मंजुरी दिली असून या धोरणात महालक्ष्मी येथील रेसकोर्सच्या भूखंडाचाही समावेश असल्याने रेसकोर्सवर थीम पार्क उभारण्याचे शिवसेना पक्षप्रमुख उद्धव ठाकरे यांचे स्वप्न भंगल्यात जमा आहे. सुधार समितीत उपस्थित सेनेच्या सदस्यांनीही धोरणाला विरोध न केल्याने उद्धव यांनी पालिकेतील सेना पदाधिकाऱ्यांची खरडपट्टी काढल्याचे समजते.

पालिकेने मुंबईतील २३४ बड्या भूखंडधारकांसह चार हजारांहून अधिक सरकारी, खासगी संस्था, व्यक्ती आणि व्यावसायिक आस्थापनांना १० ते ९९९ वर्षांच्या भाडेकरारावर भूखंड दिले आहेत. यातील काही भूखंडांचे करार संपुष्टात आल्याने नूतनीकरणाचे धोरण बनवणे आवश्यक होते. त्यानुसार सुधार समितीने या आठवड्यात २३४ बड्या जमीनमालकांच्या भूखंडांसह भाडेकरार संपलेल्या अन्य भूखंड मालकांवर दंडात्मक कारवाई करून भाडेकराराचे नूतनीकरण करण्याच्या धोरणास मंजुरी दिली. या बड्या भूखंड मालकांमध्ये रेसकोर्स चालवणाऱ्या रॉयल वेस्टर्न टर्फ क्लबचाही समावेश आहे. रेसकोर्सचा पालिकेशी असलेला भाडेकरार २०१३मध्ये संपला असून तो वाढवून देऊ नये, अशी सेनेची भूमिका होती.

शिवसेनेला आली उशिरा जाग

पालिकेच्या भूखंडावर थीम पार्क उभारण्याची घोषणा शिवसेनेने केली असून त्याचे संकल्पचित्रही तयार केले आहे. मात्र सुधार समितीत धोरणावर चर्चा करताना शिवसेनेने विरोध न केल्यामुळे एकमताने हे धोरण मंजूर झाले.

रेसकोर्सच्या नूतनीकरणाचा मार्ग मोकळा झाल्यामुळे उद्धव ठाकरे यांनी पालिकेतील शिवसेनेच्या पदाधिकाऱ्यांची खरडपट्टी काढली असल्याचे समजते. त्यामुळे झोप उडालेल्या पदाधिकाऱ्यांनी आता रेसकोर्सच्या भूखंडाचे नूतनीकरण राज्य सरकार करणार असल्याचा कांगावा करत सुधार समितीतील धोरणाला उपसूचना मांडण्याची भूमिका घेतली आहे.

रेसकोर्स, वेलिंग्टन क्लब यासह बड्या भूखंडांच्या मोकळ्या जागांचे नूतनीकरण करण्याचे अधिकार पालिका सभागृह व आयुक्तांना असावेत, पालिकाच या भूखंडांबाबत योग्य तो निर्णय घेईल, अशी उपसूचना शिवसेना सभागृहात मांडणार असल्याचे शैलेश फणसे यांनी सांगितले. मात्र एखाद्या मंजूर प्रस्तावावर कोणतीही उपसूचना मांडता येत नाही. उपसूचना मांडायची असल्यास प्रस्ताव रि-ओपन करावा लागतो, अशी माहिती पालिकेच्या अधिकाऱ्यांनी दिली.