अडीच लाख घेऊन टॅक्सीचालक पसार; दुबईच्या नागरिकाची फसवणूक

मुंबई : दुबईहून मुंबईत उपचारासाठी आलेल्या परदेशी नागरिकाचे सुमारे अडीच लाखांचे चलन घेऊन टॅक्सीचालक पसार झाल्याची घटना कुलाबा परिसरात समोर आली. दुबईच्या नागरिकाने केलेल्या तक्रारीवरून कुलाबा पोलिसांनी टॅक्सीचालकाविरुद्ध गुन्हा दाखल केला आहे.

दुबईचे नागरिक मोहम्मद अहमद जेनेबी (४६) हे वैद्यकीय उपचारासाठी ३ ऑक्टोबरला हैदराबाद येथे गेले होते. तेथून २६ ऑक्टोबरला मुंबईत परतल्यानंतर ते कुलाबा येथील एका हॉटेलमध्ये राहत होते. मुंबईहून केरळला जाण्यासाठी त्यांनी ४ डिसेंबरची रेल्वेची तिकीट काढली. त्यानुसार कुलाबा येथून हॉटेलमधून टॅक्सी पकडून जेनेबी हे छत्रपती शिवाजी महाराज रेल्वे टर्मिनस येथे निघाले. काही अंतरावर गेल्यानंतर त्यांना औषधे खरेदी करायची असल्याने त्यांनी टॅक्सी थांबविण्यास सांगितले. आपल्याकडील बॅग मागच्या सीटवर ठेवून ते औषधांच्या दुकानात गेले. काही मिनिटांत परतले असता टॅक्सी जागेवर नव्हती. आजूबाजूला शोध घेतला, मात्र टॅक्सी कुठेच दिसली नाही.

कुलाबा येथील हॉटेलच्या मॅनेजरला त्यांनी ही सविस्तर घटना सांगितली. त्याने जेनेबी यांना पोलिस ठाण्यात जाऊन तक्रार करण्यास सांगितले. त्यांच्या तक्रारीवरून पोलिसांनी गुन्हा दाखल केला. टॅक्सीमधील त्यांच्या बॅगेमध्ये दहा हजार रुपये, दुबईचे दहा हजार दिरहम, पासपोर्ट, रेल्वेचे तिकीट, कपडे तसेच इतर साहित्य होते. सीसीटीव्ही फूटेजच्या मदतीने पोलिस टॅक्सीचा शोध घेत आहेत.