परवापासून रिक्षा-टॅक्सींचा संप

अॅपआधारित खासगी सेवांनाही नियम लावण्याची मागणी

संपाची हाक

म. टा. खास प्रतिनिधी, मुंबई

ओला, उबेरसह अ‍ॅप आधारित सेवा पुरवणाऱ्या सर्व खासगी टॅक्सी कंपन्यांना सरकारने खुली सूट दिल्याने काळ्या-पिवळ्या टॅक्सीचालकांवर अन्याय होत आहे. सरकारने ओला, उबेरवर निर्बंध आणत त्यांनाही काळ्या-पिवळ्या टॅक्सींप्रमाणे सर्व अटी लागू कराव्यात, अशी मागणी जय भगवान महासंघातर्फे करण्यात आली आहे. या मागणीसाठी मंगळवार, २६ जुलैपासून मुंबई, ठाणे, नवी मुंबईमध्ये रिक्षाटॅक्सींचा बेमुदत संप पुकारण्यात येणार आहे.

ओला व उबेर चालकही शेअर सेवा पुरवत आहेत. काळ्या-पिवळ्या टॅक्सींप्रमाणे ओला व उबेर चालकांना विशिष्ट गणवेश, मीटर, चालकाचा बिल्ला आदी सर्व गोष्टी बंधनकारक कराव्यात, अशी मागणी संघटनेने केली आहे. तर ओला व उबेर चालकही शेअर सेवा पुरवत असून त्यावर बंदी घालण्याची मागणी परिवहन मंत्र्यांकडे केली आहे. मात्र त्यावर कोणताही निर्णय घेण्यात आलेला नसल्याने बेमुदत संप पुकारण्यात येणार असल्याचे अध्यक्ष बाळासाहेब सानप यांनी स्पष्ट केले.

९० टक्के चालक सहभागी?

या संपात सुमारे ९० टक्के रिक्षा-टॅक्सीवाले सहभागी होतील, असा दावा महासंघाने केला आहे. यापूर्वी, महासंघाने २१ जून रोजी आझाद मैदान येथे केलेल्या आंदोलनास हिंसक वळण लागले होते. शहरातील काही भागात रिक्षा-टॅक्सीच्या वाहतुकीवर विपरित परिणाम झाला होता. या पार्श्वभूमीवर मंगळवारपासून संघटनेने पुकारलेल्या संपामुळे वाहतुकीला फटका बसेल, अशी भीती व्यक्त होत आहे. हा संप यशस्वी झाल्यास प्रस्थापित रिक्षा-टॅक्सी संघटनांच्या ताकदीवरही परिणाम होण्याचा मुद्दा चर्चेस आला आहे.