शिक्षकांचा सिंगापूर दौरा, मात्र स्वखर्चाने

गुणवत्ता सुधारण्यासाठी शिक्षण विभागाकडून आयोजन

म. टा. प्रतिनिधी, मुंबई

राज्यातील शाळा १०० टक्के प्रगत करण्यासाठी शिक्षक- मुख्याध्यापकांचा सिंगापूर येथे आंतरराष्ट्रीय अभ्यास दौरा शिक्षण विभागाने आयोजित केला आहे. मात्र शिक्षकांनी हा दौरा स्वखर्चाने करावा, असे सरकारने म्हटले आहे.

शैक्षणिक गुणवत्तेच्या जागतिक क्रमवारीत ‘प्रोग्राम फॉर इंटरनॅशनल स्टुडंट असेसमेंट’ (पिसा) या अहवालानुसार आशिया खंडातील सिंगापूर, जपान, दक्षिण कोरिया, हाँगकाँग हे देश सर्वात पुढे असल्याचे समोर आले आहे. त्यामुळे राज्यातील शिक्षकांसाठी सिंगापूर येथे अभ्यास दौरा आयोजित करण्यात आला आहे. या दौऱ्यामध्ये सहभागी होऊ इच्छिणाऱ्या शिक्षकांपैकी प्रगत, नवोपक्रमशील शाळांमधील शिक्षक, अशा शाळा विकसित करणारे पर्यवेक्षकीय अधिकारी आणि ज्यांच्याकडे पासपोर्ट आहे, त्यांनाच प्राधान्य दिले जाईल, असे शिक्षण विभागाने जाहीर केले आहे.

या दौऱ्यांमध्ये त्या देशांमधील शिक्षण पद्धती, अध्यापन पद्धती, शैक्षणिक साधनांचा वापर यांचा अभ्यास करून आपण कुठे कमी पडतो, याबाबतचा अहवाल सादर करावा लागणार आहे. या अभ्यास दौऱ्याची पहिली तुकडी नोव्हेंबरच्या दुसऱ्या आठवड्यात सिंगापूरला भेट देणार आहे. शिक्षकांना जाण्याची परवानगी देणे एवढीच शिक्षण विभागाची भूमिका आहे. यासाठी कुणालाही आर्थिक मदत दिली जाणार नाही. सध्या विभागाकडे ३४० शिक्षकांचे अर्ज आले आहेत. त्यापैकी ४० जणांची पहिली तुकडी नोव्हेंबरमध्ये सिंगापूरला जाणार असल्याचे शिक्षण विभागाने शासन निर्णयाच्या माध्यमातून जाहीर केले आहे.

खर्च सरकारने करावा

शैक्षणिक दर्जा वाढवण्यासाठी शिक्षकांचा अभ्यास दौरा परदेशात जाणार आहे. परंतु त्यासाठी स्वतः खर्च करणे शिक्षकांना परवडणार नाही. वेतनावर अनेक गरजा पूर्ण कराव्या लागत असल्याने हा खर्च वेतनातून करणे शक्य नाही. त्यामुळे या दौऱ्याचा खर्च सरकारने करावा, अशी मागणी महाराष्ट्र प्रदेश काँग्रेस शिक्षक सेलचे उपाध्यक्ष महादेव सुळे यांनी केली आहे. तर या दौऱ्यासाठी आकारण्यात येणारा खर्च जास्त असल्याचा आरोपही काही शिक्षकांकडून करण्यात आला आहे.