म. टा. प्रतिनिधी, मुंबई
आर्थिक राजधानी असलेल्या मुंबईत लष्कर व हवाईदलाच्या संख्या वाढण्याची शक्यता आहे. संयुक्त मोहिमेसाठी नौदलाला सहकार्याच्या उद्देशाने हा निर्णय घेतला जाणार आहे. नौदलाच्या कमांडर्स परिषदेत याविषयी चर्चा झाली.
मुंबईत नौदलाचे पश्चिम कमांड मुख्यालय आहे. यामुळे मुंबईच्या सुरक्षेची पहिली जबाबदारी नौदलावर आहे. नौदलाच्या विविध नौका तसेच नौदलतळाच्या निमित्ताने एकूणच नौदल मुंबई मोठ्या संख्येने आहे. त्या तुलनेत लष्कर (आर्मी) व हवाईदलाची संख्या फार कमी आहे. पण आता ही संख्यादेखील वाढविण्याबाबत नौदलाच्या कमांडर्स परिषदेत चर्चा झाली.
आगामी काळात लष्कराच्या तिन्ही दलांत एकसंघ वातावरण असावे, असे संरक्षण मंत्रालयाचे निर्देश आहेत. त्यामुळे पुढील काळात सर्व प्रकारच्या कारवाया व मोहिमांसाठी या संयुक्त असतील. संयुक्त कारवायांसाठीच तिन्ही दलांनी एकामेकांसह समांतर पद्धतीने काम करावे; परंतु मुंबईसारख्या ठिकाणी नौदल अधिक संख्येने आहे. यासाठी संयुक्त मोहिमा करायच्या असल्यास लष्कर व हवाईदलाची संख्या वाढवता येईल का, यावर परिषदेत चर्चा झाली.
मुंबईत सध्या हवाईदलाचा एक तळ आहे. तेथे 'एमआय १७ व्ही ५' या हेलिकॉप्टरची तुकडी आहे. पण हे हेलिकॉप्टर्स फक्त वाहतूक किंवा बचावकार्याच्या उपयोगाचे आहे. तर लष्कराच्या महाराष्ट्र, गोवा आणि गुजरात क्षेत्राचे मुख्यालय आहे. पण ते मुख्यालयदेखील केवळ प्रशासकीय कामासाठी मुंबईत आहे. यामुळेच नौदलासह मोहीम करायची असल्यास ही संख्या वाढविण्याची नितांत गरज असल्याचे मत नौदलाच्या कमांडर्सने बैठकीत मांडले.