मुंबई टाइम्स कार्निव्हलमध्ये ‘नाट्यरंग’

अजय उभारे, मुंबई

मुंबई टाइम्स कार्निव्हलने असंख्य कॉलेज तरुणांच्या कलागुणांना गेली १६ वर्षे हक्काचे व्यासपीठ मिळवून दिले आहे. यंदा हीच परंपरा कायम ठेवत तरुण रंगकर्मींच्या कलेला बळ देण्यासाठी मुंबई टाइम्स कार्निव्हलमध्ये प्रथमच नाट्यरंगचा अनोखा प्रयोग रंगणार आहे. अभिनव प्रयोगांमुळे चर्चेत असलेल्या निर्वासित, रडारड आणि रिश्ता वही सोच नयी या तीन एकांकिकांचे प्रयोग १२ डिसेंबरला यशवंतराव चव्हाण नाट्यसंकुलात रंगणार आहेत. नाट्यक्षेत्रातील अनेक मान्यवर मंडळी आणि नाट्यप्रेमी या प्रयोगाला उपस्थित राहाणार आहेत.

युवा महोत्सवापासून आयएनटी, उत्तुंग, सवाई अशा विविध एकांकिका स्पर्धांमध्ये गाजलेल्या एकांकिका पाहण्याची नाट्यप्रेमींना इच्छा असते. शिवाय, नाट्यक्षेत्रातील गुरुजनांसमोर आपल्या एकाकिकांचे प्रयोग सादर करण्याची रंगकर्मींची इच्छा असते. मुंबई टाइम्स कार्निव्हल आयोजित 'नाट्यरंग'च्या माध्यमातून हा दुहेरी योग साधला जाणार आहे.

सिडनेहॅम कॉलेजची 'निर्वासित', एमडी कॉलेजची 'रडारड' आणि मिथक मुंबई या नाट्यसंस्थेची 'रिश्ता वही सोच नयी' या तीन एकांकिकांचे यावेळी सादरीकरण होणार आहे. मंगळवार, १२ डिसेंबरला दुपारी २.३० वाजल्यापासून माटुंगा येथील यशवंतराव चव्हाण नाट्यसंकुल येथे त्या रंगतील. एकांकिका स्पर्धांमध्ये आढळणाऱ्या गुणवत्तेला महाराष्ट्र टाइम्सने नेहमीच पाठबळ दिले आहे. मुंबई टाइम्स कार्निव्हलमधील नाट्यरंगद्वारे या तरुण रंगकर्मींना अनुभवी नाट्यकर्मी लेखक, दिग्दर्शक, निर्माते आणि कलावंत यांचे मार्गदर्शन लाभणार आहे.या एकांकिका पाहण्यासाठी विविध कॉलेजमधील नाट्यसंस्था आणि नाट्यप्रेमी विद्यार्थ्यांची उत्सुकताही सध्या शिगेला पोहोचली आहे.

हा कार्यक्रम सर्वांसाठी विनामूल्य आहे. महाराष्ट्र टाइम्स कल्चर क्लबच्या सदस्यांना या कार्यक्रमासाठी प्रवेश आहे. यात प्रथम येणाऱ्यास प्राधान्य दिले जाईल. कल्चर क्लबच्या सदस्यांनी अधिक माहितीसाठी ९१६७७११६४९ / ९६७३६७०८३८ या क्रमांकावर सकाळी ११ ते ७ या वेळेत संपर्क साधावा.