​ ‘आयडॉल’ प्रवेशास मुदतवाढ

५ नोव्हेंबरपर्यंत अर्ज सादर करता येणार

म. टा. प्रतिनिधी, मुंबई

मुंबई विद्यापीठाच्या दूरस्थ व मुक्त अध्ययन संस्थेच्या (आयडॉल) यंदा उशिराने सुरू झालेल्या प्रवेश प्रक्रियेस ५ नोव्हेंबरपर्यंत मुदतवाढ देण्याचा महत्त्वपूर्ण निर्णय विद्यापीठ प्रशासनाने शुक्रवारी जाहीर केला. या निर्णयानुसार २०१६-२०१७ या शैक्षणिक वर्षासाठी बीएससी आयटी व एमसीएव्यतिरिक्त इतर सर्व अभ्यासक्रमांच्या ऑनलाइन प्रवेशासाठी ५ नोव्हेंबरपर्यंत विलंब शुल्काशिवाय अर्ज करता येणार आहे.

मुंबई विद्यापीठाच्या ‘आयडॉल’ प्रवेशासाठी दरवर्षी जुलैच्या प्रारंभीच प्रवेश प्रक्रिया सुरू करण्यात येते. यंदा मात्र निविदा प्रक्रियेस विलंब झाल्याने प्रवेश प्रक्रिया ऑगस्टपासून सुरू झाली. प्रवेशासाठी २० ऑक्टोबरपर्यंत मुदत देण्यात आली होती. मात्र तोपर्यंत फक्त ७२ हजार विद्यार्थ्यांनीच‌ प्रवेश घेतला. गेल्या वर्षी एकूण ८६ हजार विद्यार्थ्यांनी प्रवेश घेतला होता. गेल्या वर्षीच्या तुलनेत यंदा विद्यार्थीसंख्या खूपच कमी असल्याने प्रवेशाची मुदत ५ नोव्हेंबरपर्यंत वाढवण्यात आली आहे.

बीए, बीकॉम, बीएससी कॉम्प्युटर सायन्स, व्दितीय व तृतीय वर्ष नॉटिकल टेक्नॉलॉजी, एमए (इतिहास, समाजशास्त्र, अर्थशास्त्र, मराठी, हिंदी, इंग्रजी, राज्यशास्त्र, गुजराती), एमए (शिक्षणशास्त्र), एमकॉम (अकाउंट्स / व्यवस्थापन), एमए / एमएस्सी (गणित), एमएस्सी (माहिती तंत्रज्ञान, संगणकशास्त्र), पीजी डीएफएम व पीजी डीओआरएम या अभ्यासक्रमांच्या प्रवेशासाठी ही मुदतवाढ लागू आहे. मुदतवाढीमुळे आणखी बऱ्याच विद्यार्थ्यांना प्रवेश घेता येणार असल्याचे विद्यापीठाने स्पष्ट केले आहे.