'लॉ'च्या परीक्षा पुढे ढकलल्या

म. टा. प्रतिनिधी, मुंबई

उशिरा लागलेले निकाल, त्यात जाहीर झालेल्या परीक्षा यामुळे हैराण झालेल्या मुंबई विद्यापीठाच्या लॉ शाखेच्या विद्यार्थ्यांना शुक्रवारी दिलासा मिळाला. विद्यार्थ्यांच्या मागणीनुसार परीक्षा व मूल्यमापन विभागाने शुक्रवारी आठ परीक्षा पुढे ढकलण्याची घोषणा केली. यातील काही परीक्षा जूनच्या पहिल्या आठवड्यात होणार असून, त्याचे सविस्तर वेळापत्रक परीक्षा विभागाने वेबसाइटवर प्रसिद्ध केले आहे.

मुंबई विद्यापीठात सुरू असलेल्या निकाल गोंधळाचा सर्वाधिक फटका लॉ शाखेच्या विद्यार्थ्यांना बसला आहे. त्यामुळे या रखडलेल्या निकालासंदर्भात दोन दिवसांपूर्वीच कुलगुरूंच्या अध्यक्षतेखाली महत्त्वपूर्ण बैठक पार पडली होती. या बैठकीत विद्यार्थ्यांच्या मागणीनुसार विद्यापीठाने एलएलबी सेमिस्टर १, पाचवर्षीय लॉ अभ्यासक्रमाचा सेमिस्टर ५, एलएलबी सेमिस्टर ५ यासारख्या इतर विषयांच्या परीक्षा पुढे ढकलल्या आहेत. यातील जवळपास सर्वच परीक्षा आता जूनच्या पहिल्या आठवड्यात होणार आहे.

>>निकाल जाहीर

परीक्षा पुढे ढकलण्याच्या निर्णयाप्रमाणेच लॉ शाखेचे काही निकाल शुक्रवारी जाहीर केले आहेत. यामध्ये एलएलबी सेमिस्टर ६, एलएलबी सेमिस्टर ४च्या एटीकेटी परीक्षांच्या निकालांचा समावेश आहे. या परीक्षांचे निकाल अनुक्रमे ३७.८५ टक्के आणि ३५.५० टक्के लागले आहेत. त्याचप्रमाणे जानेवारीत झालेल्या हिवाळी परीक्षांचे एलएलएम सत्र ३, एलएलएम सत्र ८ आणि एलएलएम सत्र १०चे निकाल ही जाहीर झाले आहेत.

>>सोमवारी शिक्षणमंत्र्यांकडे बैठक

लॉ शाखेच्या गोंधळाच्या पार्श्वभूमीवर अनेक विद्यार्थी संघटनांनी शिक्षणमंत्री विनोद तावडे यांच्याकडे तक्रार केली होती. या तक्रारीची दखल घेत विद्यापीठ अधिकाऱ्यांसह परीक्षा विभागाची विशेष बैठक सोमवारी उच्च व तंत्रशिक्षणमंत्री विनोद तावडे यांनी बोलावल्याचे समजते. या बैठकीच्या पार्श्वभूमीवरच विद्यापीठाने हे निकाल जाहीर करण्यात आल्याची माहिती पुढे आली आहे.