झाड अंगावर पडल्यानं महिलेचा मृत्यू

मटा ऑनलाइन वृत्त । मुंबई

मॉर्निंग वॉक करत असताना नारळाचं झाड अंगावर कोसळून जबर जखमी झालेल्या मुंबईतील महिलेचा उपचारादरम्यान मृत्यू झाला आहे. कांचन रघुनाथ असं या महिलेचं नाव आहे.

मुंबईतील चेंबूर येथील स्वस्तिक पार्क परिसरात राहणाऱ्या कांचन या शुक्रवारी सकाळी नेहमीप्रमाणं मॉर्निक वॉकसाठी घराबाहेर पडल्या होत्या. रस्त्यावरून जात असताना अचानक एक नारळाचं झाड नेमकं त्यांच्या अंगावर पडलं. या आघातानं त्या जागीच कोसळल्या. त्यावेळी घटनास्थळी असलेल्या नागरिकांनी कांचन यांना तात्काळ जवळच्या खासगी रुग्णालयात दाखल केलं. त्यांच्यावर कालपासून उपचार सुरू होते. मात्र, त्याला यश आले नाही. अखेर आज सकाळी त्यांचा मृत्यू झाला.

धोकादायक झाडांचा प्रश्न ऐरणीवर

मुंबईत गेल्या काही दिवसांपासून मुसळधार पाऊस सुरू असून अनेक ठिकाणी झाडांच्या फांद्या कोसळण्याच्या घटना घडल्या आहेत. पावसाळ्यापूर्वी धोकादायक झाडांची पाहणी करून ती कापण्याचं काम महापालिकेकडून केलं जातं. चेंबूर इथं पडलेलं झाड धोकादायक असल्यानं ते कापून टाकण्याची परवानगी स्थानिकांनी मागितली होती. मात्र, दिली गेली नसल्याचं आता समोर आलं आहे.