वॉचमननं टेरेसवरून फेकलं; पण १८ व्या मजल्यावर चमत्कार घडला; तरुणीसोबत नेमकं काय झालं

मुंबई: मुंबई उपनगरातील मालाडमध्ये एका सुरक्षा रक्षकानं महिलेला २० व्या मजल्यावरून खाली फेकलं. मात्र महिलेचं नशीब चांगलं होतं. १८ व्या मजल्यावर असलेल्या घराच्या खिडकीच्या छतावर पडली. त्यानंतर इमारतीमधील रहिवाशांनी पोलीस आणि अग्निशमन दलाशी संपर्क साधला. या महिलेला वाचवण्यात यश आलं. आरोपी सुरक्षा रक्षक तिथून फरार झाला होता. त्याला पोलिसांनी बेड्या ठोकल्या.

मालाड पोलिसांनी दिलेल्या माहितीनुसार, २६ वर्षांची तरुणी मालाड पश्चिमेतील ब्ल्यू होराईजनमध्ये काम करते. २८ जुलैला सकाळी पावणे दहा वाजता तरुणी तिचं काम संपवून घरी जात होती. तेव्हा तिला वाटेत इमारतीचा सुरक्षा रक्षक अर्जुन सिंह दिसला. २० व्या मजल्यावर एक महिला राहायला आली आहे. तिला मोलकरीणची गरज असल्याचं अर्जुननं तरुणीला सांगितलं.
बिल्डिंगमधील 'महिला' पॉर्न पाठवायची, १० शेजाऱ्यांनी मैत्री केली अन् पायाखालची जमीन सरकली
काम मिळेल या आशेनं तरुणी अर्जुन सोबत २० व्या मजल्यावरील फ्लॅटवर गेली. घर मालकानं तिला अर्ध्या तासानं येण्यास सांगितलं. त्यानंतर तरुणी टेरेसवर पोहोचली. त्यावेळी अर्जुन तिच्या मागून आला. त्यानं तिचा गळा धरला आणि तिला खाली फेकलं. तरुणीचं नशीब बलवत्तर म्हणून तिचा जीव वाचला. सुदैवानं ती १८ व्या मजल्यावर असलेल्या खिडकीच्या छतावर पडली.

घटनेची माहिती मिळताच पोलीस आणि अग्निशमन दलाचे जवान इमारतीत पोहोचले. त्यांनी महिलेला खिडकीतून सुरक्षित बाहेर काढलं. महिलेच्या गळ्याला, डोक्याला आणि हाताला इजा झाली होती. तिला उपचारांसाठी शताब्दी रुग्णालयात दाखल करण्यात आलं. अर्जुन सिंहविरोधात हत्येचा प्रयत्न केल्याचा गुन्हा दाखल झाला. त्याला पोलिसांनी अटक केली आहे.
तुमचा मुलगा आमच्या ताब्यात आहे, ३५ लाख द्या! मित्रांनीच केलं अपहरण, शेवट भयानक झाला
तरुणीसोबत आपले संबंध होते. त्यावरून ती ब्लॅकमेल करत असल्याचा आरोप अर्जुन सिंहनं केला. ब्लॅकमेलिंगला कंटाळून महिलेचा काटा काढण्याचं ठरवलं. त्यामुळेच तिला टेरेसवरून ढकललं, असं आरोपीनं पोलिसांना सांगितलं. मात्र पीडित महिलेनं आपले सुरक्षा रक्षकाशी कोणतेही संबंध नव्हते, असा जबाब पोलिसांना दिला.