बेकायदा होर्डिंगबद्दल ‘मनसे’ची दिलगिरी

नगर, सोलापूर पालिकेकडूनही माफीनामा

म. टा. खास प्रतिनिधी, मुंबई

‘आमचे कार्यकर्ते पुन्हा बेकायदा होर्डिंगबाजी करणार नाहीत,’ अशी हमी सर्वप्रथम देणाऱ्या महाराष्ट्र नवनिर्माण सेना पक्षाचे नगरसेवक संदीप देशपांडे यांनी सोमवारी न्यायालय अवमानाच्या नोटिशीला उत्तर देताना बिनशर्त दिलगिरी व्यक्त केली. त्याचबरोबर अहमदनगर व सोलापूर या महापालिकांच्या आयुक्तांनीही बिनशर्त माफीनामा देत यापुढे बेकायदा होर्डिंगबाजीविरोधात कठोर कारवाईची हमी दिली.

सुस्वराज्य फाऊंडेशनच्या जनहित याचिकेवरील सुनावणीनंतर बेकायदा होर्डिंगबाजी विरोधात कारवाई आणि नागरिकांसाठी तक्रार निवारण व्यवस्था करण्याचे स्पष्ट आदेश दिलेले असतानाही ११ महापालिकांकडून त्याचे पालन झाले नव्हते. तसेच मनसे, भाजप, शिवसेना, काँग्रेस, राष्ट्रवादी काँग्रेस व रिपाइं (आठवले गट) या पक्षांनीही न्यायालयाच्या आदेशाचे उल्लंघन केले होते. त्यामुळे या सर्वांना उच्च न्यायालयाने न्यायालय अवमानाबद्दल ‘कारणे दाखवा’ नोटिसा बजावल्या होत्या.

सोमवारी हा विषय न्या. शंतनू केमकर व न्या. एम. एस. कर्णिक यांच्या खंडपीठासमोर सुनावणीस आला असता, अनेक महापालिकांनी अजूनही नोटिशीला आपले उत्तर दाखल केले नसल्याचे याचिकादारांतर्फे अॅड. सिद्धेश पिळणकर यांनी निदर्शनास आणले. तर अहमदनगर व सोलापूर महापालिकांच्या आयुक्तांच्या वतीने बिनशर्त माफीसह प्रतिज्ञापत्र दाखल केले असल्याचे त्यांच्या वकिलांनी सांगितले. मनसेचे संदीप देशपांडे यांच्या वतीनेही बिनशर्त माफी मागत यापुढे बेकायदा होर्डिंगबाजी करणार नसल्याची हमी देण्यात आली.

खंडपीठाने हे नोंदीवर घेतले. तसेच राज्यातील विविध शहरांत अजूनही बेकायदा होर्डिंग लागत असतील तर त्याविषयीचे कोर्ट कमिश्नरचे अहवाल आणि सर्व महापालिकांनी न्यायालयाच्या कोणकोणत्या निर्देशांचे पालन केले त्याविषयीचा अहवाल सादर करावा, असे याचिकादारांच्या वकिलांना सांगून पुढची सुनावणी २९ ऑगस्टला ठेवली.

यापूर्वी उच्च न्यायालयाने आदेश भंगाबद्दल मुंबई भाजपचे अध्यक्ष आशिष शेलार यांच्यासह त्यांच्या कार्यकत्यांना दंड लावला होता. तसेच शरद पवार, राहुल गांधी, मुलायम सिंह अशा राष्ट्रीय नेत्यांच्या फोटोसह होर्डिंग लावल्याबद्दल त्यांच्या नावेही संबंधित पक्षांच्या कार्यकत्यांना दंड लावला होता.