BJP Rally: नाराज मुंडे समर्थकांची घोषणाबाजी

मुंबई: मुंबईत होत असलेल्या भाजपच्या स्थापना मेळाव्यातच आज महाराष्ट्र भाजपमधील गटबाजी चव्हाट्यावर आली. स्थापना मेळाव्याच्या ठिकाणी भाजपचे दिवंगत नेते गोपीनाथ मुंडे यांचं एकही पोस्टर नसल्यानं त्यांचे समर्थक नाराज झाले व त्यांनी घोषणाबाजी सुरू केली. संतप्त कार्यकर्त्यांना आवरण्यासाठी महिला व बाल विकासमंत्री पंकजा मुंडे यांना शांततेचं आवाहन करावं लागलं.

भारतीय जनता पक्षाचा ३८वा स्थापना मेळावा मुंबईतील वांद्रे-कुर्ला कॉम्प्लेक्सच्या मैदानावर होत आहे. या मेळाव्यासाठी राज्यभरातून लाखो कार्यकर्ते मुंबईत दाखल झाले आहेत. मेळाव्याच्या ठिकाणी भाजपच्या सर्व मोठ्या नेत्यांचे पोस्टर लावण्यात आले आहेत. मात्र, भाजपला महाराष्ट्रभरात पोहोचविणारे दिवंगत नेते गोपीनाथ मुंडे यांचा फोटो कुठल्याही पोस्टरवर नाही. मेळाव्याला आलेल्या मुंडे समर्थकांना ही बाब खटकली आणि त्यांनी तिथंच घोषणाबाजीला सुरुवात केली. कार्यकर्त्यांनी त्यांच्यासोबत आलेले गोपीनाथ मुंडे यांचे पोस्टरही झळकावले. या पोस्टरवर पंकजा मुंडे व खासदार प्रीतम मुंडे यांचे फोटो होते. काही कार्यकर्त्यांनी खुर्च्या उचलून आपला संताप व्यक्त केला.

अखेर कार्यकर्त्यांना आवरण्यासाठी पंकजा मुंडे व प्रीतम मुंडे यांना पुढं यावं लागलं. त्यांनी व्यासपीठावर येऊन कार्यकर्त्यांना शांत राहण्याचं आवाहन केलं. त्यानंतर कार्यकर्ते शांत झाले. मुंडे समर्थकांच्या या नाराजीची चर्चा आता पक्षातच रंगली आहे.

अमित शहा पोहोचले!

पक्षाचे राष्ट्रीय अध्यक्ष अमित शहा हे स्वत: मेळाव्याच्या ठिकाणी पोहोचले असून कार्यकर्त्यांना मार्गदर्शन करणार आहेत. मेळाव्यासाठी सुमारे ३ लाख कार्यकर्ते जमल्याचा दावा केला जात आहे. शहा या मेळाव्यात काय बोलतात आणि कुठली राजकीय घोषणा करतात, याकडं लक्ष लागलं आहे.