मुंबई: शिवसेनेने विधानसभा निवडणुकीत दहा रुपयांत थाळी देण्याच्या दिलेल्या आश्वासानाची सुरुवात मुंबई महापालिकेतून होत आहे. मुंबई महापालिकेच्या उपहारगृहात अवघ्या १० रुपयांत थाळी देण्याच्या उपक्रमाचा आज महापौर किशोरी पेडणेकर यांच्या हस्ते शुभारंभ करण्यात आला. पालिकेने दहा रुपयांत थाळी सुरू केली असली तरी ती केवळ पालिका कर्मचाऱ्यांपुरतीच मर्यादीत आहे. इतरांना पालिकेच्या उपहारगृहातून ठरवून दिलेल्या किंमतीतच थाळी घ्यावी लागणार आहे.

आज दुपारी १.३० वाजता पालिकेच्या उपहारगृहात दहा रुपयांत थाळी देण्याच्या या योजनेचा महापौर किशोरी पेडणेकर यांच्या हस्ते शुभारंभ करण्यात आला. यावेळी स्थायी समिती अध्यक्ष यशवंत जाधव, सभागृह नेत्या विशाखा राऊत, पालिका आयुक्त प्रवीण परदेशी, आरोग्य समिती अध्यक्ष अमेय घोले आणि अतिरिक्त आयुक्त सुरेश काकाणी यांच्यासह पालिका नगरसेवक मोठ्या संख्येने उपस्थित होते. या योजनेअंतर्गत पालिका कर्मचाऱ्यांना दहा रुपयांत भरपेट जेवण मिळणार आहे. ही योजना पालिका कर्मचाऱ्यांनाच लागू असल्याचेही पालिकेकडून सांगण्यत आले. बाहेरील व्यक्तिंना पालिका कँटीनमध्ये दहा रुपयांत थाळी देण्यात येणार नसल्याचं पालिकेकडून सांगण्यात आलं. मुंबईत दहा रुपयांत थाळी देण्याची योजना पालिकेकडून सुरू करणं शक्य आहे का? याचा विचार सुरू असून पालिकेच्या सर्व वॉर्ड कार्यालयातही दहा रुपयांत थाळी देण्याचं घटत असल्याचं पालिका सूत्रांनी सांगितलं.

Web results

rs 10 thali : 'येथे' मिळते दहा रुपयात थाळी...

दरम्यान, शिवसेनेने विधानसभा निडवणुकीत वचननामा प्रकाशित केला होता. त्यात राज्यात दहा रुपयांत थाळी देण्याची घोषणा केली होती. राज्यात मुख्यमंत्री उद्धव ठाकरे यांच्या नेतृत्वाखालील सरकार आलं आहे. या पार्श्वभूमीवर दहा रुपयांत थाळी देण्याच्या हालचालींना वेग आला आहे. शिवसेनेनेही राज्यातील अनेक भागात दहा रुपयांत थाळी देण्याचा प्रकल्प पक्षीय पातळीवर सुरू केला आहे. सरकार म्हणून अद्यापही दहा रुपयांत थाळी देण्याची योजना सुरू झालेली नाही. राज्यातील मंत्रिमंडळ विस्तारानंतरच मुख्यमंत्री उद्धव ठाकरे याबाबतचा निर्णय घेतील असं सांगण्यात येतं.

दहा रुपयांत थाळी; 'करून दाखवलं'