- वैद्यकीय खर्चाचा तिढा सोडवणार
- बायोमेट्रिक हजेरीतील त्रुटी लवकरच दूर
म. टा. विशेष प्रतिनिधी, मुंबई
आपल्या विविध प्रलंबित मागण्यांसाठी महापालिका कर्मचाऱ्यांनी बुधवारी आझाद मैदानात आंदोलन करून जोरदार शक्तिप्रदर्शन केले. कर्मचाऱ्यांच्या मागण्यांबाबत प्रशासनाने सकारात्मक आश्वासन दिल्यानंतर हे आंदोलन स्थगित करण्यात आले आहे. पालिका आयुक्त प्रवीण परदेशी यांच्यासोबत झालेल्या बैठकीत सातव्या वेतन आयोगाच्या थकीत २० टक्के रकमेचा हप्ता गणेशोत्सवापूर्वी दिला जाणार असून इतर मागण्यांबाबतही लवकरच तोडगा काढला जाईल, असे आश्वासन आयुक्तांनी दिले असल्याची माहिती समन्वय समितीचे निमंत्रक अॅड. सुखदेव काशिद यांनी दिली.
सातव्या वेतन आयोगाचा वेतनवाढीचा करार तातडीने करावा, बायोमेट्रिक हजेरीची पद्धत बंद करावी, गटविमा योजना लवकरात लवकर सुरू करावी यासह विविध प्रलंबित मागण्यांसाठी बुधवारी पालिका कर्मचाऱ्यांनी आझाद मैदानात आंदोलन केले. मागण्यांकडे दुर्लक्ष झाल्यास कोणत्याही क्षणी काम बंद आंदोलन करण्याचा इशारा कर्मचाऱ्यांच्या समन्वय समितीने दिला होता. बुधवारी आझाद मैदानात शेकडो कर्मचाऱ्यांनी मोर्चा काढून प्रशासनाचे लक्ष वेधले. समन्वय समितीच्या शिष्टमंडळाची पालिका आयुक्तांसोबत झालेल्या बैठकीत मागण्यांबाबत सकारात्मक चर्चा झाली.
सातव्या वेतन आयोगाच्या करारामुळे निर्माण होणाऱ्या एकूण थकबाकीमधून २० टक्के रकमेचा एक हप्ता गेल्या फेब्रुवारीमध्ये देण्यात आला होता. दुसरा हप्ता गणेशोत्सवापूर्वी दिला जाणार आहे. तसेच १ ऑगस्ट २०१७ पासून ज्या कामगार, कर्मचाऱ्यांनी वैद्यकीय खर्च केला आहे, त्यांनी दोन लाखापर्यंतची बिले सादर केल्यास त्यांना १५ दिवसांत निर्णय घेऊन पैसे दिले जातील, बायोमेट्रिक हजेरीमधील त्रुटी लवकरच दूर करण्यात येतील तसेच सहाव्या वेतन करारामधील त्रुटी दूर करण्यासाठी नेमण्यात आलेल्या रामनाथ झा समितीला वेळ नसल्यामुळे दुसऱ्या अधिकाऱ्याची नियुक्ती करून काम सुरू करण्यात येणार असल्याचे आश्वासन आयुक्तांनी दिले आहे. इतर मागण्यांबाबत येणाऱ्या काही दिवसांत चर्चा करून निर्णय घेतला जाणार असल्याचे आयुक्तांनी मान्य केले असल्याचे अॅड. काशिद यांनी सांगितले.