रुग्णांची मोठी सोय; परळ-हिंदमाता दरम्यान महापालिका बांधणार पादचारी पूल

मुंबई : परळ येथे डॉ. बाबासाहेब आंबेडकर मार्गावर रस्त्याच्या दोन्ही बाजूने ये-जा करण्यासाठी पादचारी पूल बांधण्यात येणार आहे. पुलाला सरकत्या जिन्यांची सुविधा उपलब्ध करण्यात येणार असल्याने नागरिकांना दिलासा मिळणार आहे. या कामासाठी पालिका ४ कोटी ८७ लाख रुपये खर्च करणार आहे. या पुलामुळे केईएम, टाटा, वाडिया रुग्णालयात येणाऱ्या रुग्णांची मोठी सोय होणार आहे. प्रशासनाने हा प्रस्ताव मंजूर केला आहे.

परळ भागात केईएम, टाटा, वाडिया ही मोठी रुग्णालये आहेत. तसेच या परिसरात दोन्ही बाजूच्या पदपथांवर कपड्यांची दुकाने व रहिवासी वस्ती आहे. हिंदमाता, परळ परिसरात पावसाळ्यात मोठ्या प्रमाणात पाणी तुंबण्याची समस्या निर्माण होते. हा भाग जलमुक्त करण्यासाठी हिंदमाता चित्रपटगृह-परळ पूल जोडण्यात आला आहे. दोन्ही पूल जोडण्यात आले असले तरी पादचाऱ्यांना परळ पूल किंवा हिंदमाता पुलाला वळसा घालून जावे लागते.

पादचाऱ्यांची ही गैरसोय दूर करण्यासाठी दोन्ही पुलांचा सखल भाग असलेल्या ठिकाणी पादचारी पूल बांधण्याचा निर्णय पालिकेने घेतला आहे. हिंदमाता परळ परिसरात पावसाळ्यात ठप्प पडणाऱ्या वाहतुकीवर उपाय म्हणून पालिकेने दोन उड्डाणपुलांचा जोड (कनेक्टर) तयार केला आहे. हा जोड १२ मीटर उंच आहे. यामुळे हा परिसर पूरमुक्त झाला असून वाहनधारकांना मोठा दिलासा मिळाला आहे. तसेच हिंदमाता व परळ उड्डाणपूल जोडल्याने वाहतूक कोंडीची समस्या दूर झाली आहे.

पादचाऱ्यांचा वळसा टळणार

वाहनधारकांना एकीकडे दिलासा मिळाला असताना पादचाऱ्यांची गैरसोय होऊ लागली आहे. पादचाऱ्यांना परळ पुलाला वळसा घालून इकडून तिकडे जावे लागते किंवा चित्रा सिनेमा येथून वळसा घालून पलिकडे जावे लागते. पादचाऱ्यांची गैरसोय टाळण्यासाठी आता दोन्ही पुलांवर पादचारी पूल बांधण्याचा निर्णय घेण्यात आला आहे. पावसाळ्यात या पुलामुळे रुग्ण आणि इतर पादचाऱ्यांची मोठी सोय होणार आहे.