म. टा. प्रतिनिधी, मुंबई
करोनाला हरवण्यासाठी अत्यावश्यक सेवेतील कर्मचारी खंबीरपणे उभे आहेत. महिला कर्मचारीही कुटुंबापासून दूर राहून या परिस्थितीशी दोन हात करताहेत. ही आई जेव्हा घराबाहेर पडते, तेव्हा मुलांना काय वाटत असेल, हे 'महाराष्ट्र टाइम्स'ने जाणून घेतले. 'मातृदिना' निमित्त या मुलांनी त्यांच्या भावना पत्राद्वारे व्यक्त केल्या....
.....................
तुझ्यामुळेच आम्ही निरोगी
आई : चतुरा मेकाले (सफाई कर्मचारी)
सर्वांचे आई-बाबा घरी आणि तू सफाई कामासाठी बाहेर...तुझा अभिमान आहे. कारण माझी आई मुंबई स्वच्छ ठेवण्यासाठी मेहनत घेतेय. तुझ्यासारख्यांमुळेच आम्ही निरोगी आहोत. तू घरातली जबाबदारीही व्यवस्थित सांभाळतेस. हे सर्व तू जितक्या सहजपणे करतेस, त्याचे खूप कौतुक वाटते. फक्त एकच सांगणं की, डगमगू नकोस...आमची काळजी नको. स्वत:चीही काळजी घे. - तुझा लाडका, संतोष
................
आई : राजश्री ढंग (नायर रुग्णालयात नर्स)
तू माझा आदर्श
करोनाला हरवण्यासाठी आई तूदेखील लढतेस. मला अभिमान आहे. रोज सकाळी उठून डोंबिवली ते नायर रुग्णालय प्रवास करतेस. तणावाखाली ड्युटी करते. मला कळतंय हे सोपे नाहीय. २६ वर्षे तू काम करतेस आणि कधीच हरली नाहीस. या परिस्थितीलाही तू आत्मविश्वासाने तोंड देशील. पण तरीही तुझी खूप काळजी वाटते. तू माझा आधारस्तंभ आहेस. तू माझ्या आयुष्यातील आदर्श आहेस. खूप प्रेम आई! - तुझी लाडकी, वर्षा
...............
लढाई जिंकून ये...
आई : ऋतुजा गुरव (पोलिस दलात कार्यरत)
एक महिलाही पोलिसाची जबाबदारी सामर्थ्याने पेलू शकते, हे तुझ्याकडे पाहून पटते. आता कुणी 'आई काय करते?' हे विचारतात तेव्हा मी अभिमानाने सांगते, माझी आई संपूर्ण महाराष्ट्रासाठी काम करतेय. मागील काही दिवसांपासून तू सतत बाहेर आहेस. खूप दिवस झाले तुला नीट पाहिलेही नाही. पण तू आमची काळजी करू नकोस. लढाई जिंकूनच परत ये.
- तुझी,
मिताली गुरव (मुलगी)
(संकलन- प्राजक्ता हरदास, मुंबई विद्यापीठ) (अधिक वृत्त...९)