कुर्रररsss.... राज ठाकरे यांच्या नातवाचा पार पडला नामकरण सोहळा

मुंबई : मनसे अध्यक्ष राज ठाकरे यांचे पुत्र अमित ठाकरे (Raj Thackeray Son Amit Thackeray) आणि सून मिताली ठाकरे यांना काही दिवसांपूर्वी पुत्ररत्न प्राप्त झाले. राज ठाकरे आजोबा झाल्यानंतर त्यांच्या नातवाचं नाव काय असणार, याबाबत मोठी चर्चा सुरू होती. आज अखेर नामकरण सोहळा पार असून या 'किआन' असं या चिमुकल्याचं नाव ठेवण्यात आलं आहे.

घरात नव्या पाहुण्याचं आगमन झाल्यानंतर ठाकरे कुटुंबात आनंदाचं वातावरण आहे. आमचं पूर्ण आयुष्य आता या चिमुकल्याभोवतीच फिरत आहे, असं राज ठाकरे आणि त्यांच्या पत्नी शर्मिला ठाकरे यांनी एका वृत्तवाहिनीवरील मुलाखतीत म्हटलं होतं. तसंच आता तुझे राजकीय कार्यक्रम तूच पाहा, मी संपूर्ण वेळ नातवासोबत घालवणार आहे, असं शर्मिला यांनी राज ठाकरे यांना उद्देशून म्हटलं होतं.

दरम्यान, २०१९ मध्ये मान्यवरांच्या उपस्थितीत अमित आणि मिताली लग्नाच्या बेडीत अडकले होते. हे दोघेही बालमित्र असून मैत्रीचं रुपांतर प्रेमात आणि विवाहबंधनात झालं आहे. मिताली फॅशन डिझायनर आहे. प्रख्यात बालरोग तज्ञ संजय बोरूडे यांची त्या कन्या आहेत.