राणे यांचा उद्धव, राज यांच्यावर घणाघात

मटा ऑनलाइन वृत्त । मुंबई

मराठा आरक्षणाच्या मुद्द्यावरून काँग्रेस नेते नारायण राणे यांनी आज शिवसेना पक्षप्रमुख उद्धव ठाकरे आणि मनसे अध्यक्ष राज ठाकरे यांच्यावर सडकून टीका केली. त्याचवेळी राष्ट्रवादी काँग्रेसचे नेते छगन भुजबळ यांच्या सुटकेच्या मागणीसाठी काढण्यात आलेल्या मोर्चाचे त्यांनी समर्थन केले.

मराठा आरक्षण, त्याबाबत शिवसेना, मनसेची भूमिका, दैनिक 'सामना'तील व्यंगचित्राचा वाद आणि छगन भुजबळ यांच्या समर्थनार्थ निघालेला मोर्चा याबाबत राणे आज 'एबीपी माझा' या वृत्तवाहिनीशी बोलले. यावेळी उद्धव यांनी राजकीय स्वार्थापोटी मराठा समाजाची माफी मागितली, असा आरोप राणे यांनी केला. 'सामना'तील व्यंगचित्राचे पडसाद राज्यभर उमटले. मराठा समाजातून संतप्त प्रतिक्रिया उमटल्या. शिवसेनेतील मराठा आमदार आणि खासदारांनी राजीनामे पाठवले. या दणक्यामुळे शिवसेनेला माफीनामा द्यावा लागला, असे राणे म्हणाले.

मनसे मावळलेला पक्ष

जो पक्ष उगवता उगवता मावळला, त्या पक्षाने मराठा आरक्षणाच्या मुद्द्यात लक्ष घालू नये, असा टोला राणे यांनी लगावला. राज ठाकरे यांच्याकडून मराठा आरक्षणाला पाठिंबा मिळण्याची अपेक्षा नाही. छत्रपती शिवाजी महाराजांचा खोटा इतिहास मांडणाऱ्या बाबासाहेब पुरंदरे यांचा ज्यांना पुळका आहे, अशांकडून अपेक्षा तरी काय करायची?, अशी तोफही राणे यांनी डागली.

मराठा समाजाला आरक्षण देण्याची सरकारची इच्छाशक्ती दिसत नाही, असा आरोप करताना ही परिस्थिती अशीच राहिली आणि आंदोलन अधिक तीव्र झालं तर त्याला सरकारच जबाबदार असेल असा इशारा राणे यांनी दिला. 'मराठा लाथा खाणारा नाही, लाथा देणारा आहे', असे राणे पुढे म्हणाले. आर्थिक निकषांवर आरक्षण देणं शक्य नसल्याचेही त्यांनी यावेळी नमूद केले.

भुजबळ समर्थकांच्या मोर्चाचे समर्थन

छगन भुजबळ यांच्या सुटकेच्या प्रमुख मागणीसाठी ओबीसी समाजाने नाशिकमध्ये मोर्चा काढला आहे. या मोर्चात राष्ट्रवादीचे अनेक नेते सहभागी झाले आहेत. या मोर्चाबाबत विचारले असता भुजबळांच्या समर्थनार्थ मोर्चा काढला जात असेल तर त्यात काहीही चुकीचं नसल्याचं मत राणे यांनी व्यक्त केलं.