तुमचा रूबाब आता आहे का?, परब-राणे जुगलबंदी

मटा ऑनलाइन वृत्त । मुंबई

शिवसेनेवर टीकेची एकही संधी न दवडणारे काँग्रेसचे नेते नारायण राणे आणि शिवसेनेचे आमदार अॅड. अनिल परब यांची विधानपरिषदेत जुगलबंदी पाहायला मिळाली. शिवसेनेची ताकद संपल्याची राणे यांनी टीका करताच आक्रमक झालेल्या परब यांनी 'तुमचा तो रूबाब आता आहे काय? आधी स्वत:च्या ताकदीचे मुल्यमापन करा,' असा टोला परब यांनी लगावला. त्यामुळे राणे यांचा चेहरा पाहण्यासारखा झाला होता.

जीएसटी विधेयकावरील चर्चेच्या दरम्यान नारायण राणे यांनी भाषण करताना शिवसेनेलाही चिमटे काढण्याचा प्रयत्न केला. शिवसेनेची ताकद कमी झाली, हे मी वस्तुस्थिती पाहून बोलतोय. उगाच बोलत नाही. अकोल्यात उद्धव ठाकरे यांनी जे भाषण केले, त्याचा संदर्भ घेऊन मी बोललो. शिवसेनेत पूर्वी ज्याप्रमाणे बोललेलं घडायचं, तसं आता घडत नाही. लोकशाहीत सत्तेत असणाऱ्यांनी सत्तेच्या बाजूने बोलायचं असतं. विरोधात नाही, असं मला सांगायचं होतं, असं राणे म्हणाले.

राणे यांचे हे भाषण जिव्हारी लागल्याने संतापलेल्या परब यांनी राणेंच्या भाषणाचा खरपूस समाचार घेतला. तुम्ही ३९ वर्ष शिवसेनेत होता. विरोधी पक्षनेते आणि मुख्यमंत्री असताना तुमचा रूबाब होता. ३९ वर्ष मी तुम्हाला जवळून बघत आलो. तुम्ही आलात की लोकांची झुंबड उडायची. तुम्ही गेला तरी तुमच्या मागे लोकांची गर्दी असायची. आज तुम्हीच तुमच्या ताकदीचं मुल्यमापन करा. आज तुमचा तो रूबाब आहे का? हे तुम्हीच पहा, असा चिमटा परब यांनी काढला.

म्हणून विधान परिषदेत यावे लागले

शिवसेनेची ताकद आहे तशीच आहे. शिवसेनेची ताकद होती म्हणूनच तुम्हाला विधानपरिषदेत यावे लागले. मात्र इथेही तुम्हाला गटनेतेपद मिळावे म्हणून झगडावे लागते आहे. तुम्ही गेल्यानंतरही शिवसेनेने तीनदा महापालिका जिंकली. शिवसेनेच्या ताकदीची तुम्ही काळजी करू नका, असा टोलाही त्यांनी लगावला. सभागृहात परब यांची फटकेबाजी सुरू असताना सत्ताधारी बाके वाजवून त्यांचे जोरदार समर्थन करत होते.