म. टा. विशेष प्रतिनिधी, मुंबई
कॉलेजांमध्ये आता ३१ ऑक्टोबर हा 'राष्ट्रीय एकता दिवस' म्हणून साजरा करावा अशी सूचना विद्यापीठ अनुदान आयोगाने केली आहे. सोमवारी सीबीएसई बोर्डाने त्यांच्या शाळांमध्ये हा दिन साजरा करण्याबद्दल आदेश जारी केले.
सरदार वल्लभभाई पटेल यांचा जयंतीनिमित्त 'राष्ट्रीय एकता दिन' साजरा करावा, असे विद्यापीठ अनुदान आयोगाने परिपत्रकाद्वारे दिले आहेत. या दिवशी एनसीसी युनिटने कॉलेजमध्ये संरक्षण दलातील आजी किंवा माजी अधिकाऱ्यांना निमंत्रित करून विद्यार्थ्यांना 'राष्ट्रीय एकता' या विषयावर मार्गदर्शन करावे. विद्यार्थ्यांना एकात्मतेची शपथ द्यावी, अशा सूचना परिपत्रकात करण्यात आल्या आहेत. या कार्यक्रमाचे व्हिडीओ विद्यापीठाच्या वेबसाइटवर अपलोड करावे, असेही आदेशात म्हटले आहे.
राष्ट्रीय एकता दिनाच्या आयोजनातून विद्यार्थ्यांमध्ये एकात्मतेची भावना रुजेल, त्यांना एकात्मतेचे महत्त्व पटेल, अशी अपेक्षा अनुदान आयोगाने व्यक्त केली आहे.