राज ठाकरेंचे उमेदवारच नाहीत, खर्च कशाच्या आधारे मागता: पवार

मुंबई:

मनसेचे अध्यक्ष राज ठाकरे यांनी उमेदवारच उभा केला नाही, तर त्यांना कशाच्या आधारे खर्च मागता? निवडणूक आयोगाला राज यांना खर्च मागण्याचा काय अधिकार आहे? असा सवाल राष्ट्रवादी काँग्रेसचे अध्यक्ष शरद पवार यांनी केला. दुष्काळ निवारणासाठी काय काय उपाययोजना करता येतील याबाबत मंथन करण्यासाठी राष्ट्रवादी काँग्रेसची आज बैठक पार पडली. त्यानंतर प्रसारमाध्यमांशी संवाद साधताना पवार यांनी हा सवाल केला.

मनसेचे अध्यक्ष राज ठाकरे यांना सभांचा खर्च मागितला जात असल्याबाबतच्या एका प्रश्नावर उत्तर देताना शरद पवार यांनी राज यांची पाठराखण करत त्यांना सभांचा खर्च मागणं योग्य नसल्याचं स्पष्ट केलं. १९७७ च्या काळात आणीबाणीनंतर निवडणुका लागल्या होत्या. त्यावेळी प्रसिद्ध साहित्यिक पु. ल. देशपांडे यांच्यासह अनेक नेत्यांनी सरकारविरोधात महाराष्ट्रभर सभा घेतल्या होत्या. तेव्ही मी काँग्रेसमध्येच होतो. परंतु, या नेत्यांनी सभा घेतल्या म्हणून त्यांना निवडणूक आयोगानं सभांचा खर्च मागितला नाही. सभा का घेतली? कुणासाठी घेतली? सभेचा खर्च कुणी केला? कसा केला? असा प्रश्न आयोगानं पुलं किंवा इतर नेत्यांना विचारल्याचं आठवत नाही, असं सांगतानाच ज्यांनी उमेदवार उभा केला नाही. जे स्वत: उमेदवार नाहीत. निवडणुकीत सहभागी नाही. अशी व्यक्ती सभा घेऊन देशाच्या दृष्टीने घातक काय आहे हे जर जनतेला सांगत असेल तर तो त्यांचा लोकशाहीतील सांगण्याचा अधिकारच आहे, असं पवार यांनी स्पष्ट केलं.

राज हे एका पक्षाचे नेते असले तरी त्यांनी निवडणुकीत उमेदवारच दिले नाहीत तर त्यांना खर्च का मागितला जातोय? उमेदवार नसताना त्यांनी खर्चाचा तपशील कुणाला द्यायाचा? आणि आयोगाला तरी खर्च मागण्याचा काय अधिकार आहे? ते कशाच्या आधारावर खर्च मागत आहेत? अशी प्रश्नांची सरबत्तीही त्यांनी निवडणूक आयोगावर केली.