'मारून दाखवलं'; होर्डिंगमधून सेनेवर बाण

मटा ऑनलाइन वृत्त । मुंबई

भायखळा येथील जिजामाता उद्यानातील आठ पैकी एका पेंग्विनचा मृत्यू झाल्याने मुंबईतील राजकारण चांगलंच तापलं असताना आता रस्त्यावरही त्याचे पडसाद दिसू लागले आहेत. राष्ट्रवादी युवक काँग्रेसने मुंबईत अनेक भागांत होर्डिंग लावली असून त्यावर 'मारून दाखवलं' अशी बोचरी 'कॅचलाइन' टाकून शिवसेनेला डिवचण्यात आले आहे.

मुंबई महापालिकेने याचवर्षी जुलैमध्ये दक्षिण कोरियाच्या सेऊलमधून तीन नर आणि पाच मादी असे आठ हम्बोल्ट पेंग्विन आणले होते. त्यापैकी एका पेंग्विनचा मृत्यू झाल्याने सत्ताधारी शिवसेनेवर चौफेर टीका होऊ लागली आहे. युवा सेना अध्यक्ष आदित्य ठाकरे यांच्या आग्रहामुळे हे पेंग्विन मुंबईत आणण्यात आलेत. त्यामुळे मुंबई पालिका निवडणुकांच्या तोंडावर विरोधकांच्या हाती आयतेच कोलीत सापडले असून हा विषय विरोधकांकडून चांगलाच तापवला जात आहे.

शिवसेनेच्या बालहट्टामुळे पेंग्विनचा बळी गेला, 'ये तो होना ही था', अशी बोचरी टीका याप्रकरणी काँग्रेस, मनसे या पक्षांनी शिवसेनेवर केली तर आता राष्ट्रवादी युवक काँग्रेसने त्यापुढे जात मुंबईच्या अनेक नाक्यांवर शिवसेनेचा उल्लेख न करता पेंग्विन मृत्यूचा समाचार घेणारी होर्डिंग लावली आहेत. या होर्डिंगवरील शेलके शब्द शिवसेनेला चांगलेच झोंबणारे आहेत. शिवसेनेने गेल्या पालिका निवडणुकीत 'करून दाखवलं' अशा 'कॅचलाइन'ने प्रचार करून मुंबई जिंकली होती. त्याचीच खिल्ली उडवत 'मारून दाखवलं' असा टोला या होर्डिंगमधून हाणण्यात आला आहे.



होर्डिंगमधून बाण...

- 'मारून दाखवलं!, युवराजांचा विजय असो!', 'युवराज मला मुंबईला आणू नका...', 'राणीबागेतील त्या निष्पाप पक्षाच्या मृत्यूला जबाबदार कोण?' असा शिवसेनेला झोंबणारा मजकूर यावर लिहिण्यात आला आहे.

- होर्डिंगमध्ये रक्तबंबाळ पेंग्विन दाखवण्यात आला आहे. काही होर्डिंगमध्ये शिवसेनेचा धनुष्यबाण पेंग्विनचा वेध घेतोय, असेही दाखवण्यात आले आहे.

- राष्ट्रवादी युवक काँग्रेसच्या मुंबई शाखेने ही होर्डिंग्ज लावली आहेत.