म. टा. प्रतिनिधी, मुंबई
नॅशनल सेंटर फॉर दि परफॉर्मिंग आर्टस् (एनसीपीए) आणि सिटी इंडिया यांनी सातत्याने भारतीय व पाश्चिमात्य शास्त्रीय संगीतात विविध उपक्रमांना चालना देण्यासाठी काम केले आहे. यावर्षी युवा कलाकारांना प्रोत्साहन देण्यासाठी एनसीपीए आणि सिटी इंडिया यांनी संयुक्तरित्या हिंदुस्तानी संगीताच्या क्षेत्रात अद्ययावत प्रशिक्षणासाठी शिष्यवृत्ती योजनेची घोषणा केली आहे. ही शिष्यवृत्ती भारतभरात १८-३५ वर्षे वयोगटातील अर्जदारांसाठी खुली असून उमेदवार ३१ डिसेंबरपर्यंत शिष्यवृत्तीसाठी अर्ज करता येईल. या शिष्यवृत्तीची रक्कम एक वर्षासाठी प्रति महिना १० हजार रुपये आहे.
यंदा ख्याल किंवा द्रुपद गायकी, मेलडी, सतार, सरोद, व्हायोलिन, बासरी, हार्मोनियम वाद्ये यासाठी शिष्यवृत्ती जाहीर करण्यात आली आहे. या शिष्यवृत्ती उपक्रमाबाबत बोलताना एनसीपीएच्या भारतीय संगीत विभागाच्या कार्यक्रम प्रमुख डॉ. सुवर्णलता राव यांनी भारतीय शास्त्रीय संगीत क्षेत्रातील पुढील संधी मिळाव्यात यासाठी एनसीपीएकडून व्यासपीठ देण्यात येते, असे स्पष्ट केले. या उपक्रमाच्या माध्यमातून तरुण बुद्धिमान संगीतकारांना तसेच उत्तम कलाकारांना देण्यात येते. निवडक उमेदवारांना एकूण नऊ शिष्यवृत्त्या दिल्या जातील, अशी माहिती त्यांनी दिली.
इच्छुक उमेदवारांनी आपले अर्ज आणि संगीत शिक्षणसंबंधी माहिती इमेलद्वारे ncpascholarships@gmail.com येथे किंवा सिटी- एनसीपीए स्कॉलरशिप फॉर यंग म्युझिशियन्स २०२०-२१ (हिंदुस्तानी संगीत) असे पाकिटावर लिहून नॅशनल सेंटर फॉर दि परफॉर्मिंग आर्टस्, एनसीपीए मार्ग, नरिमन पॉइंट, मुंबई- ४०००२१ येथे ३१ डिसेंबर २०१९ रोजी किंवा तत्पूर्वी पाठवावेत. अर्जात उमेदवाराचे नाव, जन्मतारीख, पत्ता, संपर्क क्रमांक / पर्यायी संपर्क क्रमांक, व्यावसायिक पात्रता, ईमेल आयडी, संगीत शिक्षक/ गुरू, एकूण प्रशिक्षणाची वर्षे आणि कामगिरी/ पारितोषिके/ शिष्यवृत्त्या आणि कामगिरी इत्यादी माहिती समाविष्ट केली गेली पाहिजे. निवडक उमेदवारांना ईमेल किंवा दूरध्वनीद्वारे कळवले जाईल. त्यांना एनसीपीए, मुंबई येथे एका ऑडिशनसाठी फेब्रुवारी २०२० मध्ये उपस्थित राहावे लागेल. एनसीपीए निवड समितीचा निर्णय अंतिम असेल. अधिक माहितीसाठी एनसीपीच्या https://ncpamumbai.com/ या वेबसाइटला भेट द्यावी.