अंतरात्म्याचा आवाज ऐकून भास्कर जाधव सेनेत

मुंबई: राष्ट्रवादी काँग्रेसचे गुहागरचे आमदार व दिग्गज नेते भास्कर जाधव यांनी आज ठरल्याप्रमाणे शिवसेनेत प्रवेश केला. शिवसेनेचे पक्षप्रमुख उद्धव ठाकरे यांनी शिवबंधन बांधून त्यांचं स्वागत केलं. 'मी मूळचा शिवसैनिक आहे. माझा अंतरात्मा मला स्वस्थ बसू देत नव्हता. आपण शिवसेनेत काम केलं पाहिजे असं आतून वाटत होतं. त्यानुसार मी शिवसेना प्रवेशाचा निर्णय घेतला,' असं जाधव यांनी यावेळी सांगितलं.

भास्कर जाधव यांनी सुमारे १५ वर्षांपूर्वी शिवसेना सोडून राष्ट्रवादीत प्रवेश केला होता. त्यानंतरच्या काळात राष्ट्रवादीनं त्यांना अनेक महत्त्वाची पदं दिली. काँग्रेस-राष्ट्रवादी आघाडी सरकारच्या काळात ते मंत्रीही होते. मात्र, गेल्या काही दिवसांपासून ते राष्ट्रवादीपासून दूर गेले होते. ते स्वगृही परतणार असल्याची चर्चा होती. काही दिवसांपूर्वी त्यांनीही त्यास दुजोरा दिला होता. त्यानुसार आज त्यांनी आमदारकीचा राजीनामा देऊन 'मातोश्री' निवासस्थानी शिवसेनेत प्रवेश केला. त्यांच्यासह राष्ट्रवादीच्या शेकडो कार्यकर्त्यांनीही हातावर शिवबंधन बांधले. शिवसेना नेते खासदार संजय राऊत, रामदास कदम यावेळी उपस्थित होते.

नार्वेकरांबद्दल कधीच काही बोललो नाही!

शिवसेना सोडताना तुम्ही उद्धव ठाकरे यांचे स्वीय सहाय्यक मिलिंद नार्वेकर यांच्यावर आरोप केले होते. आता त्यांची गळाभेट घेताय हे कसे काय, असा प्रश्न पत्रकारांनी जाधव यांना विचारला. त्यावर, 'शिवसेना सोडताना आणि सोडल्यानंतरच्या १५ वर्षांत मी कधीही कुणावरही आरोप केलेले नाहीत. मिलिंद नार्वेकरांवरही नाही. जे केलं नाही, त्यावर मी खुलासा करणार नाही. माझा कुणावरही आक्षेप नाही. जे काही समज-गैरसमज होते ते दूर झाले आहेत,' असं त्यांनी स्पष्ट केलं.