भाईंदर स्थानकात नवीन पादचारी पूल

झटपट निर्णयप्रक्रिया

म. टा. खास प्रतिनिधी, मुंबई

पश्चिम रेल्वेने सरकारी यंत्रणेतील संथगतीचा कारभार झटकत प्रवासी सुरक्षेसंदर्भातील कामांना वेग देण्याचा प्रयत्न केला आहे. त्यानुसार भाईंदर येथील नवीन पादचारी पुलासाठी निविदा उघडल्यानंतर सात दिवसांत कंत्राटदाराची नियुक्ती करून जलद कार्यवाहीचा प्रत्यय दिला आहे.

एल्फिन्स्टन रोड पुलाच्या दुर्घटनेनंतर रेल्वेने तातडीने घेतलेल्या काही निर्णयांमध्ये नव्याने उभारण्यात येणाऱ्या पादचारी पुलांचा समावेश आहे. या सर्व प्रकल्पांची वेळेत पूर्तता करण्याच्या अनुषंगाने पश्चिम रेल्वेने लालफितीच्या कारभाराचा जाच कमी करण्यासाठी झटपट निर्णय घेण्यास सुरुवात केली आहे. त्याचा भाग म्हणून गर्दीचे स्थानक म्हणून ओळखल्या जाणाऱ्या भाईंदर स्थानकात नवीन पादचारी पूल बांधण्यासाठी निविदा मागविल्या होत्या.

भाईंदर येथे नवीन पादचारी पुलाची रुंदी १० मीटर असून तिथला जुना पूल वापरासाठी बंद केला आहे. या जुन्या पुलाचे पाडकाम झाल्यावर नवीन पूल बांधला जाणार आहे. त्यासाठी ७ नोव्हेंबरला निविदा मागविण्यात आल्या होत्या. त्या सात दिवसांपूर्वी उघडून आता कंत्राटदाराचीही नेमणूक करण्यात आली आहे. या पुलाचा बांधकामखर्च ५ कोटी ४६ लाख रुपये आहे. हा नवीन पूल पूर्ण होण्यासाठी सहा ते सात महिन्यांचा कालावधी अपे​क्षित आहे.