गृहखरेदीला 'शुल्कवाढी'ची झळ; शहरांचे वर्गीकरण,रेडीरेकनरनुसार अग्निशमन सुरक्षा दर

मुंबई : नव्या घरांचे स्वप्न पाहणाऱ्या सर्वसामान्य नागरिकांना येत्या काळात अधिकची किंमत मोजावी लागण्याची शक्यता आहे. मुंबईसह राज्यभरात नवे अग्निशमन सुरक्षा शुल्क आकारण्यात येणार असून त्याचा थेट फटका घरांच्या किंमतींना बसणार आहे. अग्निशमन सुरक्षा शुल्कात बदल करण्याच्या निर्णयाला नुकत्याच झालेल्या मंत्रीमंडळाच्या बैठकीत हिरवा कंदील दाखवण्यात आला आहे. परिणामी मुंबईसह राज्यातील प्रमुख शहरांतील घरांच्या किंमतीत वाढ होण्याची शक्यता तज्ज्ञांकडून वर्तविण्यात येत आहे.

राज्यातील वाढते नागरिकीकरण व औद्यगिकीकरण लक्षात घेत अग्निसुरक्षाविषयक बाबींसाठी असलेल्या ‘महाराष्ट्र आग प्रतिबंधक व जीवनरक्षक उपाययोजना अधिनियम २००६’मध्ये बदल करण्याच्या प्रस्तावाला शिंदे-फडणवीस सरकारने नुकत्याच झालेल्या मंत्रीमंडळाच्या बैठकीत मान्यता दिली आहे. राज्य सरकारच्या या निर्णयामुळे अनेक नवे बदल होणार असतानाच अग्निशमन शुल्क वाढविण्यासही मंजुरी देण्यात आली आहे. या नव्या निर्णयानुसार अग्निशमन शुल्कात बदल करून ते बांधकांमाच्या रेडीरेकनरनुसार एकत्रित विकास नियत्रंण व प्रोत्साहन नियमावली म्हणजेच ‘युडीसीपीआर’प्रमाणे लागू होणार आहेत. त्यानुसार अग्निशमन पायाभूत शुल्क एकत्रित करून अनुसूची २मध्ये बदल करण्यासही मान्यता देण्यात आली आहे. या नव्या निर्णयाचा थेट फटका राज्यातील बांधकाम व्यावसायिकांना बसणार असून घरांच्या किमतीत वाढ होणार आहे.

अग्निशमन सुरक्षा शुल्काची आकारणी शहरांच्या वर्गीकरणानुसार होणार आहे. मुंबई, पुणे, नाशिक यांसारख्या प्रमुख शहरांमध्ये हे शुल्क वेगळे असेल. त्याचबरोबर हे शुल्क ठरविताना संबंधित इमारतींच्या उंचीचा विचारही केला जातो. वाढत्या मजल्यानुसार या शुल्कात वाढ केली जाते. दर निश्चिती करताना त्या भागातील रेडीरेकनरचा विचार केला जातो. विकासकांकडून या शुल्काची वसुली होती. तर त्यानुसार विकासक घरांच्या किंमती ठरवित असतो. त्यामुळे नव्या वर्षांत नव्या घरांच्या किंमती आणखी वाढणार असल्याची शक्यता मंत्रालयातील सूत्रांनी व्यक्त केली.

अग्निशमन दलात भरती?

राज्य मंत्रीमंडळाच्या बैठकीत अग्निसुरक्षेसंदर्भात एक सादरीकरणच करण्यात आल्याची माहितीही सूत्रांकडून देण्यात आली आहे. त्यानुसार अग्निशमन दलात लवकरच भरती करण्यात येणार असल्याचीही माहिती यावेळी देण्यात आल्याचे कळते. नव्या निर्णयानुसार आगीच्या संभाव्य धोक्यांचे मूल्यमापन करून उपलब्ध अग्निप्रतिबंधक उपाययोजनांचे त्रयस्थ संस्थेमार्फत मूल्यमापन करण्याचा निर्णय घेण्यात आला आहे.

पोलिस ठाणे-अग्निमशन शाखा जवळच

राज्यात नव्या अग्निशमन यंत्रणेची उभारणी करताना अनेक महत्त्वपूर्ण पाऊले उचलण्यात येण्याची शक्यता वर्तविण्यात आली आहे. यात प्रामुख्याने नवी अग्निशमन शाखा उभारताना यापुढे पोलिस ठाण्याच्या जवळच विचार होणार आहे. त्यामुळे पोलिस आणि अग्निशमन दलाच्या कर्मचाऱ्यांना एकत्रित समन्वय साधणे सोपे होऊ शकेल.