देवेंद्र वाघाला फिरवतोय गोल गोल...

मटा ऑनलाइन वृत्त । मुंबई

लाचार सत्तेसाठी झोल झोल झोल झोल
जनतेचा वाजतोय ढोल ढोल ढोल ढोल
देवेंद्र वाघाला फिरवतोय गोल गोल गोल गोल
सेना तुझा बीजेपीवर भरोसा हाय काय हाय काय...

असे नवे 'सोनू साँग' रचत राष्ट्रवादीचे नेते आणि राज्याचे माजी अर्थ मंत्री जयंत पाटील यांनी आज शिवसेना-भाजप युतीतील चढाओढीचा यथेच्छ समाचार घेतला. जयंत पाटील यांचे गाणे सुरू असताना त्यांना सहकारी आमदारांनीही जोरदार साथ दिली. यावेळी सभागृहात हास्याचे कारंजेही उडाले.

'सोनू, तुझा माझ्यावर भरोसा नाय काय' हे गाणे वाऱ्यासारखे सर्वत्र पसरले आहे. त्यानंतर याच चालीवर आरजे मलिष्का हिने 'मुंबई, तुझा बीएमसीवर भरोसा नाय काय' हे गाणे रचून पालिकेतील शिवसेनेच्या कारभारावर तोफ डागली. त्यामुळे उठलेले वादळ अद्याप शमलेले नसतानाच आज जयंत पाटील यांनी विधानसभेत याच गाण्यावर नवे गाणे रचून संपूर्ण सभागृहाचे लक्ष वेधून घेतले.

देवेंद्र फडणवीस यांनी शिवसेनेच्या वाघाला कशी वेसण घातली आहे आणि सेना सत्तेसाठी कशी लाचार झाली आहे, याचे खुमासदार वर्णन पाटील यांनी आपल्या गाण्यात केले आहे.

जयंत पाटील यांनी आपल्या फेसबुक पेजवर सभागृहातील हे गाणे शेअर केले आहे...