आणखी एक खर्चवाढ

मरिन ड्राइव्ह रस्तेबांधणीचे काम ८५वरून ११० कोटींवर

म. टा. खास प्रतिनिधी, मुंबई

दहा महिन्यांत पूर्ण होणाऱ्या रस्त्याचे काम दोन वर्षांनंतरही पूर्ण झालेले नाही. बांधकामासाठी ८५ कोटी रु.ची आधीच तरतूद झाली. मात्र कामास झालेल्या विलंबामुळे आणखी २५ कोटी रुपयांचे फेरबदल (व्हेरिएशन) करण्यात आले. मरिन ड्राइव्हच्या रस्त्याबाबत झालेला हा चमत्कार आहे. त्यामुळे ८५ कोटींचे कंत्राट आता ११० कोटी रु.च्या घरात जाऊन पोहोचले आहे.

एनसीपीए ते तांबे चौकापर्यंतच्या मरिन ड्राइव्ह रस्त्यावरील डी. टाटा रोड, नेताजी सुभाष रोड व डॉ. एन. ए. पुरंदरे मार्गावरील डांबरीकरण व काँक्रिटीकरण तसेच रस्ता दुभाजकाच्या सुशोभिकरणासाठी जानेवारी, २०१४मध्ये स्थायी समितीच्या मंजुरीने आरपीएस इन्फ्रा प्रोजेक्ट्स कंपनीला कंत्राट देण्यात आले होते. कंत्राट देताना पावसाळा वगळता दहा महिन्यांत काम पूर्ण करण्याचा कालावधी होता. मात्र दोन वर्षांनंतरही रस्त्याचे बांधकाम झाले नाही.

कामास झालेल्या विलंबामुळे बांधकाम साहित्याच्या दरात वाढ झाली. त्यामुळे कंत्राटाची किंमत २५ टक्क्यांनी वाढवण्यात आली आहे. या फेरबदलाचा प्रस्ताव आज, बुधवारी स्थायी समितीच्या मंजुरीसाठी येत आहे. पालिकेच्या पर्जन्य जलवाहिनी विभागाने सूचविलेले पाच कल्व्हर्ट व ३२५ मीटर लांबीची पर्जन्य जलवाहिनी टाकण्याचे काम सुरू असून, काँक्रिटीकरणाचे काम अंतिम टप्प्यात आहे. एकूण ४.५० किमीपैकी उर्वरित ३.९३ किमी रस्त्यांची सुधारणा मास्टिक तंत्रज्ञानाद्वारे डांबरीकरणाने केली जात आहे.

आयपीएलमुळे रखडले काम

डांबरीकरणाचे काम अर्धा रस्ता बंद व अर्धा रस्ता वाहतुकीसाठी खुला करून पूर्ण करायचे आहे. मात्र वाहतूक पोलिसांनी या कामासाठी परवानगी दिलेली नाही. या रस्त्यावरून जाणारे व्हीआयपी, देशी-विदेशी पाहुण्यांची मुंबई भेट, विधानसभेचे अधिवेशन, ८ एप्रिल ते २४ मे २०१५ या काळातील आयपीएल सामन्यांमुळे वाहतूक पोलिसांनी कल्व्हर्ट खोदण्यास परवानगी दिली नाही. डांबरीकरणासाठी टप्प्याटप्प्याने परवानगी दिली जाते. त्यामुळे रस्त्याच्या कामावर परिणाम झाल्याचे प्रशासनाने म्हटले आहे.