म. टा. प्रतिनिधी, मुंबई
राज्यातील दऱ्या-खोऱ्यांतील, घाटमाथ्यावरील सौंदर्य आणि निसर्गदर्शन प्रवासात 'याची देहि, याची डोळा' अनुभवण्याचे निसर्गप्रेमी आणि पर्यटकांचे स्वप्न पूर्ण करण्यासाठी पारदर्शक छताची एसटी ताफ्यात दाखल करण्याचा निर्णय एसटी महामंडळाने घेतला आहे. या गाडीच्या बांधणीचे काम सुरू असून लवकरच ती प्रवाशांच्या सेवेत दाखल होणार आहे.
मुंबई-गोवा जनशताब्दी एक्स्प्रेसमधील 'विस्टाडोम' अर्थात पारदर्शक छत असलेल्या रेल्वेडब्यांच्या धर्तीवर या गाडीची बांधणी करण्यात येणार आहे. अशा प्रकारचा प्रयोग करणारे राज्य परिवहन अर्थात एसटी महामंडळ देशातील पहिलेच महामंडळ ठरेल.
महामंडळातील आयुर्मान पूर्ण झालेल्या गाड्यांच्या चेसिस वापरून त्यावर माइल्ड स्टीलने बांधणी करण्यात येणार आहे. या गाडीचे छत पारदर्शक काचेचे असणार आहे. तसेच खिडक्याशेजारील भागही काचेचा बनवण्याचे नियोजन आहे. या गाडीची बांधणी औरंगाबाद, चिखलठाणा येथील कार्यशाळेत लवकरच सुरू करण्यात येईल. एक गाडी प्रोटोटाइप म्हणून बनवण्यात येईल. तिच्या प्रतिसादानंतर पुढील निर्णय घेण्यात येणार आहे, अशी माहिती एसटीतील सूत्रांनी दिली.
महामंडळात नावीन्यपूर्ण प्रयोग नेहमीच राबवण्यात येतात. त्यापैकी हा एक आहे. पारदर्शक एसटीसाठी महामंडळात अभ्यास सुरू आहे, असे महामंडळाचे उपाध्यक्ष आणि व्यवस्थापकीय संचालक शेखर चन्ने यांनी सांगितले.
राज्यातील रस्त्यांची अवस्था अतिशय बिकट आहे. खड्ड्यांमुळे यात आणखी भर पडते. अशातच मुंबई-कोकण महामार्गाचे काम सुरू आहे. गाव-खेड्यातील खराब रस्त्यांमुळे नवीन गाड्याही काही वर्षांत खिळखिळ्या होऊन जातात. यामुळे काचेच्या छतावर आणि खिडक्यांवर याचा परिणाम होण्याची शक्यता आहे. काचेच्या एसटीची बांधणी करताना हे आव्हान कायम असणार आहे, असे एसटीतील अधिकारी सांगतात.
सध्या या गाडीचा मार्ग निश्चित झालेला नाही. मात्र पारदर्शक छत असल्याने कोकण मार्गावर तसेच घाट मार्गावर ही गाडी धावेल. मुंबई-पुणे आणि मुंबई-नाशिक अशा मार्गांवरदेखील ती यशस्वी ठरू शकेल, अशी शक्यता अधिकाऱ्यांनी वर्तवली आहे.
...............
पारदर्शक छताच्या एसटीचा विषय नुकत्याच झालेल्या महामंडळाच्या बैठकीत समोर आला होता. अशा प्रकारची एसटी बनवल्यास त्याचा नक्कीच फायदा प्रवाशांना, पर्यटकांना होईल. याबाबत निर्णय विचाराधीन आहे.
- अनिल परब, परिवहनमंत्री आणि अध्यक्ष, एसटी महामंडळ
.........
राज्यातील दऱ्या-खोऱ्यांतील, घाटमाथ्यावरील सौंदर्य आणि निसर्गदर्शन प्रवासात 'याची देहि, याची डोळा' अनुभवण्याचे निसर्गप्रेमी आणि पर्यटकांचे स्वप्न पूर्ण करण्यासाठी पारदर्शक छताची एसटी ताफ्यात दाखल करण्याचा निर्णय एसटी महामंडळाने घेतला आहे. या गाडीच्या बांधणीचे काम सुरू असून लवकरच ती प्रवाशांच्या सेवेत दाखल होणार आहे.
मुंबई-गोवा जनशताब्दी एक्स्प्रेसमधील 'विस्टाडोम' अर्थात पारदर्शक छत असलेल्या रेल्वेडब्यांच्या धर्तीवर या गाडीची बांधणी करण्यात येणार आहे. अशा प्रकारचा प्रयोग करणारे राज्य परिवहन अर्थात एसटी महामंडळ देशातील पहिलेच महामंडळ ठरेल.
महामंडळातील आयुर्मान पूर्ण झालेल्या गाड्यांच्या चेसिस वापरून त्यावर माइल्ड स्टीलने बांधणी करण्यात येणार आहे. या गाडीचे छत पारदर्शक काचेचे असणार आहे. तसेच खिडक्याशेजारील भागही काचेचा बनवण्याचे नियोजन आहे. या गाडीची बांधणी औरंगाबाद, चिखलठाणा येथील कार्यशाळेत लवकरच सुरू करण्यात येईल. एक गाडी प्रोटोटाइप म्हणून बनवण्यात येईल. तिच्या प्रतिसादानंतर पुढील निर्णय घेण्यात येणार आहे, अशी माहिती एसटीतील सूत्रांनी दिली.
महामंडळात नावीन्यपूर्ण प्रयोग नेहमीच राबवण्यात येतात. त्यापैकी हा एक आहे. पारदर्शक एसटीसाठी महामंडळात अभ्यास सुरू आहे, असे महामंडळाचे उपाध्यक्ष आणि व्यवस्थापकीय संचालक शेखर चन्ने यांनी सांगितले.
राज्यातील रस्त्यांची अवस्था अतिशय बिकट आहे. खड्ड्यांमुळे यात आणखी भर पडते. अशातच मुंबई-कोकण महामार्गाचे काम सुरू आहे. गाव-खेड्यातील खराब रस्त्यांमुळे नवीन गाड्याही काही वर्षांत खिळखिळ्या होऊन जातात. यामुळे काचेच्या छतावर आणि खिडक्यांवर याचा परिणाम होण्याची शक्यता आहे. काचेच्या एसटीची बांधणी करताना हे आव्हान कायम असणार आहे, असे एसटीतील अधिकारी सांगतात.
सध्या या गाडीचा मार्ग निश्चित झालेला नाही. मात्र पारदर्शक छत असल्याने कोकण मार्गावर तसेच घाट मार्गावर ही गाडी धावेल. मुंबई-पुणे आणि मुंबई-नाशिक अशा मार्गांवरदेखील ती यशस्वी ठरू शकेल, अशी शक्यता अधिकाऱ्यांनी वर्तवली आहे.
...............
पारदर्शक छताच्या एसटीचा विषय नुकत्याच झालेल्या महामंडळाच्या बैठकीत समोर आला होता. अशा प्रकारची एसटी बनवल्यास त्याचा नक्कीच फायदा प्रवाशांना, पर्यटकांना होईल. याबाबत निर्णय विचाराधीन आहे.
- अनिल परब, परिवहनमंत्री आणि अध्यक्ष, एसटी महामंडळ
.........