म. टा. प्रतिनिधी, मुंबई
रविवारी, गुढीपाडव्यापासून शालिवाहन शक १९४० विलंबीनाम संवत्सराला सुरुवात झाली. या वर्षामध्ये अधिक मास येत असल्याने हे वर्ष १३ महिन्यांचे आहे. हे वर्ष १८ मार्च २०१८ पासून शुक्रवार,५ एप्रिल २०१९ पर्यंत आहे, अशी माहिती पंचांगकर्ते दा. कृ. सोमण यांनी दिली.
अधिक ज्येष्ठ महिना १६ मेपासून १३ जूनपर्यंत येत आहे. त्यामुळे वटपौर्णिमेपासूनचे सर्व सण सुमारे वीस दिवस उशिरा येणार आहेत. या वर्षामध्ये एकूण तीन सूर्यग्रहणे आणि दोन चंद्रग्रहणे होणार आहेत. शुक्रवार २३ जुलैचे खग्रास चंद्रग्रहण भारतातून दिसणार आहे. मात्र १३ जुलै २०१८ रोजी होणारे खंडग्रास सूर्यग्रहण, ११ ऑगस्ट २०१८ रोजी होणारे खंडग्रास सूर्यग्रहण, ५ जानेवारी २०१९ रोजी होणारे खंडग्रास सूर्यग्रहण आणि २१ जानेवारी २०१९ रोजी होणारे खग्रास चंद्रग्रहण भारतातून दिसणार नाही, अशीही माहिती सोमण यांनी दिली.
सोनेखरेदीसाठी या वर्षात ९ ऑगस्ट, ६ सप्टेंबर आणि ४ ऑक्टोबर असे तीन गुरुपुष्ययोग येणार आहेत. गणेशभक्तांसाठी ३ एप्रिल, ३१ जुलै आणि २५ डिसेंबर अशा एकूण तीन अंगारकी चतुर्थी येणार आहेत. या वर्षामध्ये विवाहोत्सुकांसाठी वैशाख, निज ज्येष्ठ, आषाढ, मार्गशीर्ष, पौष, माघ आणि फाल्गुन महिन्यांमध्ये विवाहमुहूर्त आहेत.