म. टा. प्रतिनिधी, मुंबई
पश्चिम रेल्वेवरील भाईंदरहून आलेली लोकल मध्यरात्रीनंतर पाऊण वाजता दादर स्थानकात शिरली... लोकलमध्ये आसनाखाली एका पिशवीत संशयास्पद वस्तू असल्याचा फोन रेल्वे सुरक्षा बलाला आला... तपासणी केली असता, त्यामध्ये चक्क सात दिवसांचे लहानगे अर्भक आढळले... एखाद्या चित्रपटात शोभावी अशी घटना नुकतीच दादर स्थानकात घडली. वेळीच आलेला फोन आणि आरपीएफने दाखवलेल्या सतर्कतेमुळे या नवजात बाळाचे प्राण वाचले. हे बाळ शीव रुग्णालयात सुखरूप असल्याची माहिती मुंबई सेंट्रल रेल्वे पोलिसांनी दिली आहे. मात्र समाज एवढा भावनाशून्य होत आहे का, असा प्रश्नही या घटनेमुळे निर्माण झाला आहे.
शनिवारी रात्री भाईंदर लोकलच्या मोटरमन डब्यातील आसनाखाली प्लास्टिकच्या पिशवीमध्ये संशयास्पद वस्तू असल्याचा फोन रेल्वे सुरक्षा बलाच्या नियंत्रण कक्षाला आला. नियंत्रण कक्षाने याची माहिती दादर स्थानकाचे व्यवस्थापक आणि रेल्वे पोलिसांना दिली. लोकल दादर स्थानकात येताच फ्लॅटफॉर्मवर गस्त घालत असलेले आरपीएफ जवान रामवतार गुर्जर आणि लखन लाल सैनी यांनी डब्याची तपासणी केली. त्यावेळी आसनांखाली पांढऱ्या रंगाच्या प्लास्टिकच्या पिशवीत, कपड्यात गुंडाळलेले नवजात अर्भक आढळले आणि त्यांनाही धक्काच बसला. आरपीएफ जवानांनी तातडीने त्या बाळाला शीव रुग्णालयात दाखल केले.
रात्री उशिरा रुग्णालयातील डॉक्टरांनी बाळाची संपूर्ण तपासणी केली. तपासणीअंती हे बाळ अवघे सात दिवसांचे असल्याची बाब समोर आली. बाळाच्या चेहऱ्यावर स्मितहास्य पाहून डॉक्टरांसह आरपीएफ जवानांनी सुटकेचा नि:श्वास सोडला. सद्यस्थितीत बाळ शीव रुग्णालयात सुखरूप असल्याची माहिती मुंबई सेंट्रल रेल्वे पोलिसांनी दिली. याबाबत कळताच 'माणुसकीने टाकले, तरी नियतीने तारले,' अशी चर्चा आरपीएफ आणि रेल्वे स्थानकांमधील अधिकाऱ्यांमध्ये सुरू झाली.
पालकांचा शोध सुरू
या घटनेप्रकरणी अज्ञात पालकांविरुद्ध कलम ३१७नुसार लहान मुलाला उघड्यावर टाकून दिल्याचा गुन्हा नोंदवण्यात आला आहे. या पालकांचा शोध घेण्याचे काम सुरू आहे.
पश्चिम रेल्वेवरील भाईंदरहून आलेली लोकल मध्यरात्रीनंतर पाऊण वाजता दादर स्थानकात शिरली... लोकलमध्ये आसनाखाली एका पिशवीत संशयास्पद वस्तू असल्याचा फोन रेल्वे सुरक्षा बलाला आला... तपासणी केली असता, त्यामध्ये चक्क सात दिवसांचे लहानगे अर्भक आढळले... एखाद्या चित्रपटात शोभावी अशी घटना नुकतीच दादर स्थानकात घडली. वेळीच आलेला फोन आणि आरपीएफने दाखवलेल्या सतर्कतेमुळे या नवजात बाळाचे प्राण वाचले. हे बाळ शीव रुग्णालयात सुखरूप असल्याची माहिती मुंबई सेंट्रल रेल्वे पोलिसांनी दिली आहे. मात्र समाज एवढा भावनाशून्य होत आहे का, असा प्रश्नही या घटनेमुळे निर्माण झाला आहे.
शनिवारी रात्री भाईंदर लोकलच्या मोटरमन डब्यातील आसनाखाली प्लास्टिकच्या पिशवीमध्ये संशयास्पद वस्तू असल्याचा फोन रेल्वे सुरक्षा बलाच्या नियंत्रण कक्षाला आला. नियंत्रण कक्षाने याची माहिती दादर स्थानकाचे व्यवस्थापक आणि रेल्वे पोलिसांना दिली. लोकल दादर स्थानकात येताच फ्लॅटफॉर्मवर गस्त घालत असलेले आरपीएफ जवान रामवतार गुर्जर आणि लखन लाल सैनी यांनी डब्याची तपासणी केली. त्यावेळी आसनांखाली पांढऱ्या रंगाच्या प्लास्टिकच्या पिशवीत, कपड्यात गुंडाळलेले नवजात अर्भक आढळले आणि त्यांनाही धक्काच बसला. आरपीएफ जवानांनी तातडीने त्या बाळाला शीव रुग्णालयात दाखल केले.
रात्री उशिरा रुग्णालयातील डॉक्टरांनी बाळाची संपूर्ण तपासणी केली. तपासणीअंती हे बाळ अवघे सात दिवसांचे असल्याची बाब समोर आली. बाळाच्या चेहऱ्यावर स्मितहास्य पाहून डॉक्टरांसह आरपीएफ जवानांनी सुटकेचा नि:श्वास सोडला. सद्यस्थितीत बाळ शीव रुग्णालयात सुखरूप असल्याची माहिती मुंबई सेंट्रल रेल्वे पोलिसांनी दिली. याबाबत कळताच 'माणुसकीने टाकले, तरी नियतीने तारले,' अशी चर्चा आरपीएफ आणि रेल्वे स्थानकांमधील अधिकाऱ्यांमध्ये सुरू झाली.
पालकांचा शोध सुरू
या घटनेप्रकरणी अज्ञात पालकांविरुद्ध कलम ३१७नुसार लहान मुलाला उघड्यावर टाकून दिल्याचा गुन्हा नोंदवण्यात आला आहे. या पालकांचा शोध घेण्याचे काम सुरू आहे.