‘मॉन्सूनर्स शो’मध्ये नवोदितांना सुसंधी

मुंबई : राज्यभरातील विविध कला महाविद्यालयांतील पदवी परीक्षा नुकतीच उत्तीर्ण झालेल्या चित्रकार, शिल्पकारांना काळा घोडा येथील जहांगिर आर्ट गॅलरीमध्ये दरवर्षी ‘मॉन्सूनर्स शो’मध्ये कला सादर करण्याची संधी देण्यात येते. हे खास प्रदर्शन या विद्यार्थ्यांना जागतिक पातळीवरील कवाडे उघडून देते. या प्रदर्शनाची आज, शुक्रवारपासून सुरुवात होत असून, ते ३० जुलैपर्यंत सुरू राहणार आहे.

जहांगिर आर्ट गॅलरीतर्फे राज्यातील कला महाविद्यालयांना या प्रदर्शनाची माहिती दिली जाते. प्रदर्शनाचे हे ३९वे वर्ष असून, यंदा १२ महाविद्यालयांच्या ६८ विद्यार्थ्यांनी यात सहभाग नोंदवला आहे. प्रत्येक विद्यार्थ्याच्या दोन कलाकृती प्रदर्शनाच्या माध्यमातून जगासमोर येतात. यामध्ये त्या कलाकाराची शैली ग्राहकांच्या पसंतीला आली तर त्यांना पुढे इतर गॅलरी, कॉर्पोरेट हाऊसेस अशी संधी मिळत जाते.

या प्रदर्शनामध्ये चित्र, शिल्प, प्रिंट, सिरॅमिक, टेक्सटाइल, सिरॅमिक अशा श्रेणींमध्ये कलाकृती मांडण्यात येणार आहेत. विशेष म्हणजे यात विषयाचे बंधन नसते. या कलाकृतींची किंमत २५ हजार ते दोन लाखांपर्यंत आहे. विद्यार्थ्यांसाठी ही पहिली पायरी असल्याने जहांगिर आर्ट गॅलरीतर्फे या प्रदर्शनासाठी शुल्क घेतले जात नाही. मात्र कलाकृती विकल्या गेल्यास त्यातील २५ टक्के किंमत घेतली जाते.