नऊ विद्यार्थी ताब्यात

पेपरफुटीप्रकरणी एका तंत्रज्ञाचीही चौकशी

म. टा. प्रतिनिधी, मुंबई

मुंबई विद्यापीठाची झोप उडवणाऱ्या टीवायबीएमएस (बॅचलर ऑफ मॅनेजमेंट स्टडीज) पेपरफुटी प्रकरणाचे मूळ कांदिवलीतील एका कॉलेजात असल्याची माहिती पोलिस सूत्रांकडून समोर आली आहे. या प्रकरणी या काॅलेजातील एका तंत्रज्ञासह दहा विद्यार्थ्यांना अंबोली पोलिसांनी शुक्रवारी चौकशीसाठी ताब्यात घेतले. हे पेपरफुटीप्रकरण व्हॉट्सअॅपपुरते मर्यादित नसून ई-मेलच्या माध्यमातूनही पेपर इतरांना पाठवल्याचे तपासात पुढे आले आहे.

मुंबई विद्यापीठाच्या टीवायबीएमएसचे सलग तीन पेपर फुटल्याने याप्रकरणी विद्यापीठाकडून गुरुवारी अंबोली पोलिस ठाण्यात तक्रार नोंदवण्यात आली. टीवायबीएमएसच्या सेमिस्टर पाचचा मार्केटिंग : ई कॉमर्स अ‍ॅण्ड डिजिटल मार्केटिंग या विषयाचा पेपर होता. परीक्षा सुरू होण्यापूर्वी अंधेरी पश्चिम येथील एमव्हीएम कॉलेज ऑफ कॉमर्स अ‍ॅण्ड सायन्स या परीक्षा केंद्रावर बीएमएसच्या एका विद्यार्थिनीकडे मोबाइल असल्याची बाब पर्यवेक्षकांच्या निदर्शनास आली. पर्यवेक्षकांनी त्या मुलीचा फोन तपासला असता त्यात सुरू होणार असलेल्या पेपरची प्रश्नपत्रिका होती. याबाबतची माहिती महाविद्यालयाच्या प्राचार्यांनी विद्यापीठाचे प्र-कुलगुरू डॉ. व्ही. एन. मगरे यांना दिल्यानंतर त्यांनी पोलिसांत गुन्हा नोंदवण्याचे निर्देश दिले.

या प्रकरणी पोलिसांनी आतापर्यंत १० विद्यार्थ्यांना ताब्यात घेतले आहे. ताब्यात घेतलेल्यांपैकी एका २८ वर्षीय तंत्रज्ञाने कांदिवलीच्या एका विद्यालयातून हा पेपर डाऊनलोड केला होता. त्यानंतर तो त्याने ई-मेलद्वारे काही जणांना पाठवला. त्यानंतर पुढे हा पेपर व्हॅाट्सअॅप ग्रुपवर आला. ज्या मुलीच्या ग्रुपवर हा पेपर आला होता, त्या ग्रुपमध्ये २६ जण होते. या प्रकरणात पोलिस टप्प्याटप्प्याने विद्यार्थ्यांकडे चौकशी करत असल्याची माहिती सूत्रांनी दिली आहे.

...

पेपरफुटी प्रकरणात अवघ्या २४ तासांत दहा आरोपींना अटक करण्यात आली आहे. अटक आरोपींमध्ये विद्यार्थ्यांसह काही कर्मचाऱ्यांचाही समावेश आहे. पोलिसांनी या प्रकरणात नऊ विद्यार्थ्यांचे मोबाईल, संगणक, प्रिंटर, डीव्हीआर मशिन हस्तगत केले आहे. पुढील तपास सुरू आहे.

- परमजितसिंग दाहिया, पोलिस उपायुक्त झोन नऊ